Durante e di 29 edicion di Accion di Bario na Rooi Afo y Seroe Preto, e mainta a cuminsa cu un momento special dedica na Robert Maduro, un persona cu pa hopi decada a contribui na enrikece nos cultura y herencia musical. Na cas di Sra. Henrika Boekhoudt, Prome Minister Mike Eman a haci entrega di un plakkaat di reconocimento na Robert Maduro, den presencia di su amigonan, coleganan y personanan cu a comparti hopi momento memorabel cune durante su carera. E homenahe tabata un muestra di aprecio pa su aporte na musica Arubiano y pa e herencia cultural cu e ta laga pa e generacionnan presente y futuro. Pa hopi aña caba, Robert Maduro ta conoci como un amigo di famia Boekhoudt. Sra. Henrika Boekhoudt a expresa cu e ta sinti su mes honra di por ofrece su hogar como escenario pa e reconocimento, permitiendo amigo y conocirnan reuni pa celebra trayectoria di un persona cu a dedica gran parti di su bida na promocion y preservacion di nos cultura.
E reconocimento a sirbi no solamente pa honra su talento musical, sino tambe pa destaca importancia di e personanan cu, cu nan dedicacion y amor pa Aruba, a contribui na mantene bibo nos identidad cultural y fortalece nos sentido di identidad como pueblo. Banda di su carera como cantante, musico y promotor cultural, Robert Maduro tambe a hunga un papel importante den e proyecto Porta pa Harmonia. Como un di e guianan y mentornan principal di e iniciativa, hunto cu otro figura musical reconoci, Robert a comparti su conocemento, experiencia y amor pa musica cu e generacionnan nobo.
Mas despues durante e Accion di Bario, Robert Maduro tambe a participa na e encuentro na Fundacion Centro Famia Piedra Plat. Hunto cu Prome Minister Mike Eman y varios adulto mayor presente, el a comparti un momento di convivencia scuchando e experiencianan, preocupacionnan y ideanan di e participantenan. Su presencia a contribui na un ambiente di amistad y conexion entre diferente generacion.
E homenahe na Robert Maduro ta un recordatorio cu Aruba mester sigui aprecia y reconoce esnan cu a contribui na forma nos identidad como pueblo. Pa medio di su aporte na musica y cultura, Robert Maduro a yuda fortalece e orguyo cultural Arubiano y a inspira hopi hende durante su bida.
