Cuanto lo tin di sufri pa logra e pan
den tempo di calamidad pa su yiunan
bida a bira un caos cu tanto problema
hende ta bira cara pa no bin na e tema.
Rikesa i material a bira noticia di dia
ta core tras di cosnan sin mira alegria
ofensa i huzgamento ta sende candela
entre un pueblo pa cuminsa cu e guera.
E homber umilde ta pensa cu su hogar
no por soporta tanto carga i na su lugar
ta busca un solushon pa mantene firme
como tata cabes di famia por defende.
Otro tata no por a soporta tanto dolor
a busca refugio pa no mira tur e eror
den remedinan sikiera por a bin calma
e angustia i sufrimento den su stoma.
Tin biaha ta core huzga e cabes di cas
sin pensa kiko su anhelo pa logra mas
debilidad ta pone su caminda dificil
sin pensa su lucha i e peso no ta fasil.
NO HUZGA I NO DESPRECIA E HOMBER
LAGA TUR COS DEN MAN DI DIOS LIBER
CU A CREA E HOMBER PROME CU MUHER
PA TUMA SU RESPONSABILIDAD I DEBER.
Prov: 17:6 / Romanos 2:1
Autor : Omaira I.Rodriguez-Britten
