Gobierno y FCCA ta inverti den mantencion di mas cu 141 cas na San Nicolas: Trabounan na Village, Caya Sint Maarten y Caya Guadeloupe ta enfoca riba mehora calidad di bida y cuido di comunidad

Gobierno di Aruba y Fundacion Cas pa Comunidad Arubano (FCCA) a anuncia oficialmente e inicio di un programa amplio di mantencion di mas cu 141 cas na Village, San Nicolas. A inicia cu casnan den Caya Sint Maarten y Caya Guadeloupe, cu enfoke riba mehora e estado di e casnan y fortalece e calidad di bida di e habitantenan. E anuncio a ser haci awe mainta durante un encuentro den Village, den presencia di Prome Minister Mike Eman, Minister di Infrastructura René “Baba” Herde y director di FCCA Julie Wever, hunto cu habitantenan y representantenan di e comunidad.

Segun Prome Minister Mike Eman, e trabounan di mantencion tin un significado cu ta bay mas leu cu renobacion fisico. “Nos ta mira den hopi bario e necesidad pa mantencion, pero tambe necesidad pa e cariño humano y e atencion personal cu hopi biaha ta haci falta. Nos presencia aki ta mustra cu Gobierno y FCCA ta sigui comprometi cu e calidad di bida di nos ciudadano,” e Prome Minister a declara.

Prome Minister a recorda cu durante un periodo anterior a inverti den infrastructura di Village, incluyendo acera, klinkers, mata y e prome fase di renovacion di casnan. Awo Gobierno y FCCA ta uni forsa atrobe pa sigui cu e siguiente fase di mehoracion. Ademas di e mantencion di e casnan, Gobierno y FCCA lo evalua tambe posibilidadnan pa mehora e curanan. Segun Prome Minister, e deseo ta pa crea un area mas agradable y bon cuida pa e famianan cu ta biba den e bario.

E programa tambe lo considera opcionnan pa inclui propietario di casnan den algun di e facilidadnan futuro, pa asina logra un miho aparencia general di e bario y reduci e diferencianan visual entre casnan di huur y casnan particular.

Durante su discurso, Prome Minister a enfatisa cu e prioridad principal ta pa sigui inverti den e calidad di bida di pueblo Arubano. “Unda nos ciudadano ta biba, ta recrea y ta lanta su famia, tin prioridad pa e Gobierno aki. Tur siman nos ta bishita un bario diferente pa scucha, mira y compronde miho unda tin necesidad di cambio y con nos por traha hunto cu comunidad pa logra esey,” Prome Minister a expresa.

Prome Minister a gradici FCCA y su ekipo pa e coordinacion di e proyecto, cu lo cubri mas cu 141 cas den San Nicolas. Tambe e a expresa su aprecio pa e habitantenan y pa e miembronan di prensa cu ta comparti informacion tocante e trabounan den e diferente barionan.

Gobierno a anuncia cu e recorido pa mehora barionan lo continua durante e proximo periodo, mientras cu tambe lo lansa un campaña di conscientisacion pa motiva mas ciudadano participa activamente den mehora calidad di bida den nan propio comunidad.

“Nos tur por aporta na un miho Aruba. Gobierno por crea oportunidad, pero ta hunto cu comunidad cu nos por haci e diferencia,” Prome Minister a conclui.