E islanan ABC ta biba den un tension y expectativa enorme pa e di dos buelta di e Fase di Grupo di Mundial 2026. Tur wowo ta poni riba nos isla bisiña Corsou, cu awe diasabra ta enfrenta Ecuador den e imponente Kansas City Stadium. Despues di e derota di 7-1 contra Alemania, e seleccion di coach Dick Advocaat tin mester di un resultado positivo pa mantene e speransa bibo, mietras cu e fanaticada a invadi Merca den un ambiente di fiesta total.
Advocaat ta keda realista pero orguyoso
Den e rueda di prensa oficial, e veterano DT Dick Advocaat a mustra su banda mas realista pero alabes emocional. Enfrentando e criticatnan despues di e partida contra Alemania, Advocaat a insisti cu pueblo mester disfruta di e aventura historico aki:
“Bo tin cu mira unda nos tabata dos aña pasa; tabatin absolutamente nada. Pa medio di esfuerso di hopi hende, awe nos ta riba un Mundial. Esey ta un logro sin precedente cu e pueblo aki lo no lubida nunca mas den nan bida. Laten we trots zijn dat we hier staan,” Advocaat a declara.
Pa e partido di awe, Advocaat a admiti cu Ecuador tin hopi calidad individual y un ritmo halto debi cu nan hungadonan ta activo den e miho liganan mundial, pero el a sigura cu e seleccion lo hunga mas compact, mas sutil y lo traha mas duro pa compensa e diferencia.
Di su banda, e coach di Ecuador, Sebastian Beccacece, a mustra hopi respet pa Advocaat y e seleccion di Corsou: “Nos sa cu Corsou tin un tecnica excelente, bon pase y cu nan por hinca gol den momentonan clave. Nos no ta bay subestima nan.”
E scenario pa clasifica
E speransa pa Corsou no a muri. Si Corsou logra bati Ecuador awe y Alemania haci su trabou contra Costa de Marfil (Ivoorkust), e di tres bishita contra e Africanonan den e ultimo partido di grupo lo ta crucial. Den e formato aki, e gol di Livano Comenencia contra Alemania por boga na fabor di e seleccion si mester dicidi e pase pa via di gol diferencia. Comenencia mes a subraya: “E tabata un soño pa score riba un Mundial, pero mi no por keda pega den e momento ey. Awo e focus ta 100% riba Ecuador.”
Fiebre di Mundial: Corendon y Tumba na Kansas City
E ambiente rond di e seleccion ta un locura total. E compania Corendon a mobilisa un ekipo di 45 empleado pa opera vuelonan special yen di fanatico cu a biaha for di e islanan pa Kansas City. Pa esnan cu a sali for di aeropuerto, e ritmo di DJ Beetz a percura pa niun hende no drenta avion drumi.
Ademas, awe e festival di FIFA Fan Festival na Kansas City lo tin un toke netamente Antiano, unda e dos biaha ganado di Tumba, Raey, lo ta riba escenario pa presenta e “Blue Wave” dilanti di miles di fanatico internacional.
Agenda di partidonan y prediccionnan pa awe
Analisando e momento di cada seleccion, e expertonan ta pronostica partidonan cu hopi presion organisa. Aki ta e skema di e 4 partidonan pa awe (Orario di Aruba) compaña pa nan respectivo analisis:
Hulanda vs Suecia – 1:00 PM (Grupo F, Houston Stadium)
Prediccion: Un duelo sumamente balansa entre e tactica Hulandes y e fisicismo di e bishitantenan di Suecia. Hulanda ta faborito pa su individualidad, sperando un victoria pisa di 2-1 for di “Oranje”.
Alemania vs Costa de Marfil – 4:00 PM (Grupo E, Toronto Stadium)
Prediccion: Despues di e demonstracion destructivo di 7-1 contra Corsou, Alemania ta drenta cu confiansa halto. Costa de Marfil tin velocidad, pero e mashin Aleman mester domina e partido aki pa sigura nan pase. Prediccion: 3-1 na fabor di Alemania.
Ecuador vs Corsou – 8:00 PM (Grupo E, Kansas City Stadium)
Prediccion: Ecuador tin e presion di a perde nan prome partido, mietras Corsou mester mustra un cara mas solido den defensa. Si Dick Advocaat logra un sistema ultra compact pa frena e atakenan rapido di e Sur Americanonan, Corsou por horta un punto historico. E pronostico ta un bataya duro cu por termina 1-1 of un victoria minimo di 2-1 pa Ecuador si Corsou comete foutnan inicial.
Tunesia vs Hapon – 12:00 AM (Grupo F, Monterrey Stadium)
Prediccion: Hapon ta conoci pa su disciplina tactico y transicionnan den velocidad Extremo. Tunesia lo trata di cera e espacionan, pero e dinamismo Asiatico mester ta suficiente pa nan laga e tres puntonan bay nan fabor. Prediccion: 2-0 pa Hapon.
E arbitro encarga pa dirigi e crucial partido di Corsou lo ta e Chines Ning Ma. Tur cos ta cla pa un dia historico unda e islanan ABC lo para keto pa apoya nan seleccion.
