Asociacion di Futbol di Aruba (AVB) ta invita tur su Club Miembro di Division Damas, Division Uno (1) y Division Honor pa participa na e loting oficial cu lo marca e preparacion pa inicio di Campeonato 2026-2027. E actividad aki lo tuma luga diaranson 14 di october 2026, pa 6:00 di atardi, na Eagle Bowling Sasaki.
E loting ta forma parti di e preparacionnan di AVB pa e temporada nobo di futbol, caminda e clubnan participante lo haya oportunidad pa conoce e proceso di organisacion di e campeonato.
Ademas di e loting, AVB ta introduciendo un iniciativa pa mehora e structura logistico relaciona cu asignacion di uniform pa cada partido. E meta ta pa facilita e trabou di e Match Coordinatornan y evita confusion relaciona cu color di uniform di e equiponan durante e campeonato.
Clubnan mester presenta nan uniform di Home y Away
Como parti di e preparacion aki, AVB ta solicita tur Club Miembro di Division Damas, Division Uno y Division Honor pa presenta na e loting cu nan uniform oficial di Home y Away.
E clubnan mester presenta e siguiente uniformnan:
- Home: Shirt, short y mea.
- Away: Shirt, short y mea.
- Goalkeeper Home: Shirt, short y mea.
- Goalkeeper Away: Shirt, short y mea.
Segun AVB, ta hopi esencial pa tur club acudi cu e uniformnan solicita, pa asina por registra e informacion necesario y prepara e coordinacion di uniform durante e partidonan.
E Match Coordinatornan di AVB cu lo ta presente na e actividad lo encarga nan mes cu registracion di e colornan di uniform di cada club. E informacion aki lo yuda pa determina cu anticipacion cua uniform cada equipo mester uza durante un partido.
AVB kier promove uniform di clubnan
Otro obhetivo importante di e iniciativa ta pa duna mas visibilidad na e uniformnan di e clubnan participante.
AVB ta desea di presenta y promove e uniformnan oficial di su Miembronan via social media y medionan di prensa na Aruba, como parti di un campaña di promocion pa e Campeonato 2026-2027.
Cu e iniciativa aki, e federacion ta busca di combina un miho organisacion logistico cu promocion di e equiponan cu lo participa den e temporada nobo.
AVB ta enfatisa importancia di participacion di tur Club Miembro na e loting di diaranson 14 di october, no solamente pa e proceso di loting, sino tambe pa e registracion di uniform y inicio di e campaña promocional.
Cu e preparacionnan aki, AVB ta duna un paso mas den organisacion di e Campeonato 2026-2027, cu participacion di Division Damas, Division Uno y Division Honor.
