Prome Minister mr. Mike Eman hunto cu Minister di Turismo, Transporte y Labor mr. Wendrick Cicilia a reuni cu e “deskundigengroep democratisch deficit” di Tweede Kamer, un grupo independiente di experto cu ta studia con e funcionamento democratico den Reino Hulandes por bira mas fuerte y haci mas representativo pa tur ciudadano. E delegacion a consisti di dr. Aubrich Bakhuis, presidente di e grupo, mr. Johan Sjiem Fat, dr. Rachnilda Arduin, prof. dr. Leonard Besselink y mr. Gytha Boerwinkel, kende ta fungi como secretario di e werkgroep.
Durante e encuentro, e grupo di experto a entrega y papia cu Prome Minister Eman tocante dos documento. E prome documento ta un nota cu ta delinea e direccion, enfoke y e pasonan di e investigacion tocante e deficit democratico den Reino. E di dos documento ta uno cu ta presenta un introduccion di e iniciativa y e participantenan cu ta contribui na e investigacion. Durante e reunion tambe a wordo intercambia pensamento riba e trabou cu e grupo di experto ta realisa. Como parti di nan investigacion, e grupo di experto a formula un total di 31 proposicion cu tin como meta reduci e deficit democractico y fortalece e representacion democratico den Reino Hulandes.
Como señal di aprecio durante e encuentro, Prome Minister Mike Eman a entrega cada experto un copia di e buki “Volk van Veerkracht” di Luc Alofs y René Zwart. E publicacion ta relata e historia di resiliencia, perseverancia y fortalesa di pueblo Arubiano, y ta mustra con Aruba a logra desaroya su mes identidad y capacidad pa supera diferente reto durante generacionnan.
E encuentro ta forma parti di un serie di dialogonan cu Prome Minister Mike Eman ta tene den Hulanda tocante futuro di Reino, cooperacion mutuo y e necesidad pa continua traha riba un relacion cu mas ekilibrio, transparente y democratico entre e paisnan cu ta forma parti di Reino Hulandes.
