Loke a cuminsa como un proyecto musical ambicioso na cuatro scol piloto, awe a bira un di e iniciativanan educativo mas inspirador di Aruba. Durante e concierto anual di clausura di Leerorkest Aruba dialuna ultimo, mas di 620 mucha a subi podium pa mustra mayornan, familiarnan, maestronan y comunidad loke nan a siña durante e ultimo aña escolar.
Cu hopi orguyo, concentracion y alegria visibel, e hoben musiconan a presenta un concierto impresionante cu no solamente a mustra nan desaroyo musical, sino tambe e forza di colaboracion, disciplina y confianza den nan mes.
Leerorkest Aruba a wordo funda na 2019 y a cuminsa durante e prome Gabinete Wever-Croes como un proyecto piloto na cuatro scol primario. E prome conciertonan di clausura a tuma luga separadamente riba cada scol. Conforme e proyecto a sigui crece, e conciertonan conhunto di fin di aña a muda pa localnan mas grandi, prome na Gloria Theater y despues na Renaissance Convention Center, unda awor cientos di mucha ta toca hunto den un solo gran orquesta.
E exito di Leerorkest ta un resultado di e esfuersonan conhunto di hopi persona comprometi. Un palabra di gradicimento ta bay pa tur e alumnonan pa nan dedicacion y perseverancia, pa mayornan y familiar pa nan apoyo continuo, pa e scolnan participante y nan directiva, maestronan y personal pa nan colaboracion, y principalmente pa e maestronan di musica cu ta guia e muchanan cu pasion y pasenshi durante henter aña.
Un gradicimento ta bay tambe pa director Patrick de Heus, cu a biaha for di Hulanda pa guia y inspira e alumnonan, manera tambe pa tur boluntario, partner y sponsor cu a contribui tras di escenario pa haci e evento special aki posibel.
Un palabra special di agradecimiento ta bay pa Juliette van Romondt, e forsa grandi tras di Leerorkest Aruba. Danki na su vision, dedicacion incansabel y compromiso constante, e proyecto por a desaroya te bira loke e ta awe: un programa bunita cu ta yega na centenares di mucha cada aña y duna nan e oportunidad pa descubri y desaroya nan talento pa medio di musica.
Ex-Prome Minister y miembro di Parlamento Evelyn Wever-Croes a enfatisa su compromiso continuo cu e proyecto: “For di principio mi a sostene Leerorkest cu conviccion total, pasobra mi ta kere den e poder transformado di musica. Musica no solamente ta siña muchanan toca un instrumento, pero tambe colabora, scucha, persevera y tin confiansa den nan mes. Ta algo masha bunita pa mira con e iniciativa aki a crece y cuanto mucha ta ricibi oportunidad pa descubri nan talento.”
Evelyn Wever-Croes a enfatisa cu tambe den futuro e lo sigui sostene Leerorkest Aruba sin reserva. “Mi apoyo pa e proyecto aki ta incondicional y permanente. Inverti den nos muchanan ta inverti den futuro di Aruba, y Leerorkest ta comproba aña tras aña con balioso e inversion ey ta.”
