Celebracion Dia di San Juan y Dera Gay 2026 no mester tin impacto negativo pa bo salud ni medio ambiente

Directie Natuur en Milieu (DNM) ta desea pueblo feliz dia di Dera Gay y ta desea pa e celebracion di San Juan ta uno consciente cu amor pa nos cultura cu tin di haci cu cosecha pero respetando naturalesa y medio ambiente. Alabes recorda con nos antepasadonan a promove tradicionnan y custumbernan cu te dia di awe nos a incorpora den nos cultura local. E tradicion di Dera Gay mes ta uno cu ta bin di e celebracion di agricultura di un refleccion di cosecha exitoso. Den e ultimo tempo nos no por papia di cosecha exitoso como cu tin retonan manera yobida hopi limita. Esaki ta nifica cu no lo tin mucho restonan organico e biaha aki.

Antes tawata kima e restonan organico (resto di mata) pa asina por reuza e tera cu e sas den dje pa e siguiente cosecha. E resto di material organico no mester wordo clasifica como sushi. E practica di kima resto organico hendenan a bin ta confundi e kimamento tradicional cu kima resto di sushi no-organico. Consecuentemente hende a cuminsa kima hopi material hunto y esaki ta forma un problema di kimamento sin control riba e dia di Dera Gay. DNM ta desea cu e practica di kima resto di cosecha y agricultura keda uno cu tin haci cu celebracion cultural y no kima desperdicio no-organico sin control.

Kimamento no kiermen cu nos mester actua contra ley of causa daño na nos salud, naturalesa y medio ambiente. Pa e motibo aki DNM kier avisa pueblo pa pone atencion na e siguiente puntonan.

·       Ta prohibi pa cende candela riba caminda publico. Esaki ta prescribi den ley, articulo 14 di e ordenansa di polis (APV).

·       Articulo 8 di APV, ta prohibi pa causa molester na bisiña por ehempel door di cende candela y kima.

·       Pone atencion na unda ta cende candela. Tin tereno di naturalesa cu ta protegi pa ley y ta prohibi pa cende candela den e areanan aki. Manera Spaans Lagoen, Parke Nacional Arikok, nos areanan di parke marino protegi. E motibo pa esaki ta cu e candela ta causa daño na nos flora y fauna, c uta nos patrimonio.

Celebracion nacional Dia di Dera Gay 2026 mester ta uno responsabel.  Yuda reduci e impacto cu kimamento tin riba nos naturalesa, medio ambiente y salud, ta e mas sincero deseo di DNM.