Durante e Reunion Publico riba e proposicion di Fondo di Inversion y Desaroyo, lider di fraccion di PPA, Eduard Pieters, a lansa un pregunta fundamental: “Si Aruba ta creando un fondo multimiyonario pa futuro di pais, unda exactamente e inversionnan aki lo cambia bida di pueblo?”
Segun Pieters, niun hende por nenga cu Aruba a pasa door di un periodo di recuperacion economico despues di pandemia. Pero e realidad cu hopi ciudadano ta confronta cada dia ta diferente di e cifranan positivo cu gobierno ta presenta.
“Economia por ta creciendo, pero hopi famia ainda ta lucha pa sobrebibi. Costo di bida ta subi, gasoline ta aumenta, servicio ta bira mas caro y hopi ciudadano no ta sinti e prosperidad cu constantemente ta gobierno ta anuncia.”
Crecimento sin calidad di bida
Pieters a recorda cu durante e añanan Aruba a conoce un desaroyo economico rapido. Sinembargo, e crecimento ey no semper ta compaña pa e inversionnan structural den calidad di bida. Aworaki Aruba ta confronta infrastructura cu a keda atras, e aceranan den mal estado, e camindanan yen di buraco y un sistema cu no semper por responde na e necesidadnan creciente di nos comunidad.
“Nos no por sigui midi exito solamente den cantidad di turista, ingreso fiscal of surplus. E pregunta principal ta: con pueblo ta biba?”
Segun e parlamentario, prosperidad nacional solamente tin balor, ora e traduci den bienestar real pa ciudadano.
Un fondo pa tur cos
Un di e preocupacionnan principal di PPA ta e alcance extremadamente amplio di e fondo.
Den su forma actual, e fondo ta inclui infrastructura, desaroyo economico, sostenibilidad, digitalisacion, innovacion y diferente otro area di inversion.
Pa Pieters, esaki ta precisamente unda e peliger ta.
“Ora bo kier cu un solo fondo pa atende tur cos, e riesgo ta, cu finalmente bo no ta logra ningun meta cu profundidad ni impacto duradero.”
PPA ta boga pa un direccion mas enfoca, cu e prioridadnan cla y e metanan realmente midibel.
Inverti den ser humano
Mas cu critica, Pieters a presenta un vision alternativo pa futuro di Aruba.
Segun Pieters, e inversion di mas importante cu un pais por haci no ta den concreto, asfalt of edificio, sino den su pueblo. “Nos herencia di mas balioso no ta nos infrastructura. Ta nos ser humano.” PPA ta propone p’e fondo enfoca riba enseñansa, capacitacion profesional, tecnologia, agricultura innovativo, siguridad alimentario y salud preventivo.
Particularmente den enseñansa, Pieters a boga pa integracion mas profundo di e habilidadnan di siglo 21, innovacion tecnologico y fortalecimento continuo di nos maestronan.
Futuro no ta construi cu e proyectonan aisla
Pa Pieters, Aruba mester move for di politica di reaccion y drenta den un modelo di planificacion nacional, cu ta conecta vision, presupuesto y resultado.
“Nos no por sigui djis construi proyecto pa un siguiente eleccion. Nos mester construi Aruba pa e siguiente generacion.” Esey, segun e lider di PPA, ta e berdadero reto tras di e Fondo di Inversion: no solamente gasta placa, pero crea un pais, cu e futuro generacionnan por hereda cu orguyo.
