E homber J.S. (23) a presenta recien den Corte di Husticia pa e caso penal cu Ministerio publico a cuminsa contra di dje. E ta wordo acusa di bendemento di droga y armanan di candela.
SOLO DI PUEBLO por a compronde cu apesar cu J.S. ta para riba cu e no a bende droga y tampoco armanan, Hues ta hay’e culpabel y a confirma e exigencia di Fiscal di 3 aña di prison.
Fiscal a ta acusa J.S. cu riba 30 Mei 2026 e tabatin 44 gram di cocaina den su posecion, cu entre 14 Januari 2026 y Mei 2026, e tabata bende marihuana. Tambe e ta wordo acusa cu entre December 2025 y Mei 2026, e tabatin armanan den candela den posecion. Ya tin 154 dia sera den KIA.
DROGA HAYA DEN CAS
Hues a bisa cu dia 18 Mei 2026, Polis a para un auto pa control y a haya holor di marihuana. J.S. tabata den auto y e doño di e auto A. Ta asina cu J.S. a core bay na pia y Polis a detene A. Ta asina cu Polis a haya cocaina den auto. A. a bisa cu e droga ta di J.S. Relaciona cu esey dia 30 Mei 2026, Polios a detene J.S. na su cas y a haya 44 gram di cocaina. A haya den su cel diferente potret di armanan di candela. Tambe chatnan di bendemento di droga y posibel armanan di candela.
J.S. a bisa Hues cu e no tabatin nada den e auto. J.S. ta para riba cu e no tabatin droga den e auto. El a bisa Hues cu loke Polis a haya na su cas tabata di dje y pa propio uso. Hues a puntra J.S. pakico el a core bay. Segun J.S. e tabata bou influencia di droga y no tabata kier tin problema cu Polis. Hues a bisa cu e homber A. a bisa cu e droga tabata di J.S. J.S. a bisa Hues cu a haya A. cu e droga y loke A. a bisa no ta corecto. El a bisa cu A. a tira culpa riba dje pa A. sali di bon. J.S. a bisa cu e no tabata stuur e auto sino A. El a bisa cu e no tin auto y a haya lift di A. El a bisa cu el a laga su cellular den e auto. Fiscal a bisa cu Polis a haya den e auto unda J.S. tabata sinta, un tubo di e chuculati M&M cu cocaina aden. J.S. ta para riba cu e no tabatin droga den e auto y cu e droga tabata di A.
Hues a remarca cu e droga cu a haya na cas di J.S. tabata basta hopi. J.S. a bisa cu e tabatin un cantidad cu e tabata usa. Hues a remarca cu 44 gram ta hopi. J.S. a bisa cu e no ta haya cu e cantidad ta asina grandi compara cu otronan cu ta gara. Hues a puntra J.S. cuanto e ta usa pa dia. El a bisa cu 4 gram di cocaina pa dia.
ARMANAN DI CANDELA
Hues a mustra cu den e cellular di J.S. a haya cantidad di chatnan tocante droga y potretnan di arma. J.S. a admiti cu e tabatin arma y cu ta videonan hopi bieu di dje cu arma. El a bisa cu e no a bende ningun arma y no a menaza hende cu arma. El a bisa cu tin potretnan manda via AI cu hende a manda p’e pa e cumpra. Segun J.S. den pasado el a bira victima di atraco cu violencia ora di cumpra marihuana y cu nan a bay cu su placa. E tabata busca pa sa kende(nan) a haci’e. Hues a mustra cu tin hopi chat di marihuana. Segun J.S. e no ta bende marihuana. El a splica cu e tabata busca pa sa kendenan a dal e y bay cu su placa. Hues a mustra cu tin chat cu un tal J. cu ta ofrece un arma y J.S. a ofrece droga a cambio. Segun J.S. esey tabata papiamento so. Hues a mustra tambe cu J.S. tabata ofrece pistol Glock y otro pistol pa bende y a menciona prijs 9 mil florin. J.S. ta para riba cu e tabata haci asina pa haya sa si tin un grupo cu ta atraca hende. Hues a menciona otro chat caminda J.S. ta ofrece Glock y droga na un otro persona. Segun J.S. esey ta un persona cu den pasado a maltrat’e. Hues a remarca cu den cel ta mira potretnan di hopi droganan y armanan cu J.S. tabata ofrece na diferente hende. Tambe ta mira cantidad di placanan cu J.S. tin. Segun J.S. ta solamente chat tabatin y nada mas.
Fiscal a remarca na J.S. si realmente J.S. ta kere cu loke e ta bisa ta e berdad!
FISCAL A EXIGI 3 AÑA DI PRISON
Fiscal a bisa cu J.S. a core bay ora di control di auto riba 18 Mei 2026. Na J.S. su cas riba 30 Mei 2026 a haya tubo di M&M cu 44,6 gram di cocaina, mas cu 500 florin y 24 dollar. Fiscal a mustra cu gran parti di prueba a haya den cellular di J.S., cu el a laga atras den e auto di A. Den e cellular tin potretnan di armanan y droganan. Tambe tin chatnan cu ta duna e indicacion cu J.S. ta bende droga y arma. Tin chatnan caminda J.S. ta ofrece armanan y droga pa bende.
Fiscal a bisa cu J.S. a bisa cu e cocaina ta di dje y ta pa propio uso. Den auto di A. a haya tubo di M&M cu 4 gram di cocaina. A. a bisa cu e droga ta di rasta, kende ta J.S. Fiscal a mustra cu J.S. ta wordo yama Rasta. E ta haya cu for di e chatnan por conclui cu J.S. tabata ofrece droganan. Fiscal a menciona chatnan y prijsnan cu J.S. tabata menciona. Fiscal ta haya cu durante 4 luna, J.S. a ofrece 5 hende droga pa cumpra. Fiscal no ta kere declaracion di J.S. cu e tabata pruba di haya sa kende(nan) a dal’e abao.
Fiscal a mustra cu a haya hopi potretnan di J.S. cu armanan. Tambe tin videonan di J.S. cu armanan. Tabatin videonan cu J.S. cu pistool den cada man. Tabatin chat caminda J.S. ta ofrece armanan pa bende y ta menciona prijs. Tambe J.S. tabata menciona cu tin municion y silenciador.
Fiscal ta haya legalmente proba e acusacionnan di bendemento di droga, posecion di armanan di candela y ofrece armanan di candela pa bende. Fiscal a remarca cu na October 2025, J.S. a caba di sali for di KIA pa asunto di arma di candela y algun luna despues e ta bolbe cay pa arma di candela.
Fiscal a bisa cu e ta considera J.S. residivista di arma di candela. Fiscal a exigi 36 luna di prison di cual 6 luna ta condicional y 3 aña di prueba. Fiscal tambe a exigi pa e cellular keda confisca y tambe e placanan cu a confisca na e cas di J.S.
ABOGADO
Mr. Canwood a bisa Hues cu J.S. a admiti cu e cocaina cu a haya na su cas ta di dje. E cocaina cu a haya den auto di e homber A., J.S. ta desmenti cu ta di dje. Abogado ta haya cu e homber A. a tira culpa riba J.S. y no por kere A. su declaracion. Pa loke ta e armanan, J.S. a splica cu el a bira victima di atraconan y tabata kier sa kendenan a haci’e cun’e. Pesey e tabata haci ofertanan. E abogado a bisa cu no a haya ningun arma di candela na J.S. su cas. E cantidad di cocaina cu a haya na cas, ta pa J.S. su propio consumo y cu esey lo dura 9 dia. Na opinion di abogado, for di e chatnan di droga, no tin ningun chat cu e bendemento a keda conclui. Mesun cos tabata sosode cu e armanan. Abogado ta haya cu mester declara J.S. liber pa e asuntonan di armanan. E abogado ta haya cu solamente por castiga J.S. pa e cocaina na su cas. Abogado ta haya e castigo exigi di Fiscal demasiado halto.
Fiscal a reacciona cu tin chat caminda hende ta bisa cu un dama ta busca e droga serca J.S. pa bende y trece e placa pa J.S. Tambe tin un hende ta bisa cu e tin miedo di J.S. pasobra J.S. ta bende arma cu no ta sirbi. J.S. a bis’e pa trece e arma bek y evita cu e tin mal nomber.
SENTENCIA
Hues a dicta sentencia di biaha. Tocante e cocaina den e auto, Hues a bisa cu a haya cocaina den e auto y tabatin un otro hende den auto. No por prueba cu J.S. ta doño di e cocaina. Na J.S. su cas si a haya cocaina. Pa loke ta e acusacionnan di bendemento di marihuana y diferente armanan, Hues a mustra cu tin potretnan di marihuana y armanan. Hues a remarca cu tin masha hopi chatnan den cellular di J.S., caminda J.S. ta papia di prijsnan y tabata haci palabracionnan. Hues a mustra cu J.S. a bisa cu e tabata haci manera cu e ta deal pero no ta asina. Hues a bisa cu no tin prueba cu J.S. a tuma hende haci. Hues a bisa cu e no ta kere J.S. Al contario, Fiscal a prueba cu tabatin palabracion cu a bay busca e droga y cu a yega di cumpra arma. Tambe Hues ta haya prueba posecion di arma pasobra ta mira video y potretnan cu J.S. tabatin armanan den man. Hues a remarca na J.S. cu esakinan ta casonan hopi serio! Especialmente armanan cu ta un problema serio na Aruba. Hues a bisa cu mester actua cu man duro contra esaki! Ademas no ta mucho tempo pasa cu J.S. a sali liber di posecion di arma.
Hues a bisa cu e ta haya cu no por reclama e exigencia di Fiscal. Hues a confirma e exigencia di Fiscal. Hues a condena J.S. na 3 aña di prison di cual 6 luna ta condicional cu un tempo di prueba di 3 aña. Por a mira cu J.S. tabata keda sacudi cabez ora cu Hues tabata bisa e castigo. J.S. a reclama pakico e ta haya asina hopi castigo y otronan no. E miembro di CEA a hala su atencion pa keda trankil y a bay cun’e.
