Pa Yvonne Webb-Kock, e declaracion oficial di Kapel Emanuel como monumento protehi ta un momento cu ta toca hende na dos nivel: como yiu di e arkitecto cu a diseña e edificio y como ex-director di Monumenten Bureau Aruba, e institucion cu durante añanan a traha pa preserva e patrimonio historico di nos isla. “Ta un honor pa nos famia. Nos ta hopi orguyoso cu e diseño a haya proteccion,” Yvonne a expresa.
Segun Yvonne, Kapel Emanuel ta mucho mas cu un edificio. E ta un luga cu ta carga cu spiritualidad y cu ta mustra e talento y vision di su tata, Virgilio Kock, kende tabatin apenas 25 aña ora el a diseña e kapel. “Bo ta pensa cu un hoben di 25 aña a crea un edificio asina moderno. El a inspira den un angel y a incorpora e naturalesa di Aruba den su diseño.”
Virgilio Kock tabata e prome Arubiano cu a bira ingeniero na DOW. Na e añanan sesenta, ora gran parti di e edificionan na Aruba tabata sigui un estilo mas tradicional, Pastoor Bas a encarga e hoben arkitecto pa diseña un kapel moderno na San Nicolas.
E resultado tabata un edificio unico. Su forma ta recorda e halanan habri di un angel y e incorpora simbolonan di e religion catolico den un manera inovado.
“Bo mester imagina Aruba den e añanan sesenta,” Yvonne a conta. “No tabatin hopi edificio moderno. E iglesia aki tabata algo super moderno pa e tempo ey.”
Pa Yvonne, e proteccion di Kapel Emanuel no ta solamente un reconocemento na e talento di su tata, sino un paso importante pa preserva nos patrimonio.
“Ta hopi importante pa nos proteha edificionan, specialmente esnan cu a wordo diseña pa arkitectonan local. Nan no ta solamente piedra y bloki.”
Segun Yvonne, cada monumento ta conta un historia. Nan ta conserva recuerdonan, emocionnan y e identidad di un comunidad.
“Un edificio ta conta historia di e hendenan cu a biba aden. Y luganan spiritual manera Kapel Emanuel ta carga hopi emocion y significado.”
Como ex-director di Monumenten Bureau Aruba, Yvonne sa cu e caminda pa declara un monumento protehi no ta facil. E proceso ta exigi estudio profundo, investigacion y documentacion pa determina si e balor original di e edificio a wordo conserva.
“E ta un caminda largo. Bo mester investiga, documenta y confirma cu e balor historico y arkitectonico ainda ta presente.”
Awe, despues di hopi aña di esfuerso, Kapel Emanuel oficialmente ta forma parti di e patrimonio protehi di Aruba.
Pa Yvonne Webb-Kock, esaki ta e miho garantia cu e legado di su tata lo sigui biba.
“Nos monumentonan ta un herencia pa e siguiente generacionnan. Nan ta recorda nos ken nos ta y cua ta e historia cu nos mester conserva.”
