Parlamentario di AVP, Ing. Carlos A. Bermudez, a presenta pregunta oficial na Minister di Infrastructura, drs. Rene Herde, pa haya claridad tocante e estado deplorabel di e caminda cu ta conecta e rotonde banda di Super Food cu e rotonde di Palm Beach. E iniciativa aki a sigui despues cu Bermudez a ricibi varios keho di residente, automobilista y chauffeur di taxi tocante e condicion di e ruta.
Segun Bermudez, e caminda ta mustra desgaste serio, cu hopi buraco, iregularidad den e asfalt y falta di mantencion, loke no solamente ta afecta comodidad di conductor, sino cu tambe ta crea situacionnan peligroso pa siguridad di trafico. Considerando cu esaki ta un di e camindanan mas transita di Aruba, e parlamentario ta considera cu accion rapido ta absolutamente necesario.
Den su preguntanan oficial, Bermudez ta pidi e titular di infrastructura pa informa si e ministerio ta na altura di e mal estado di e caminda, ki plan concreto tin pa ehecuta mantencion y si tin intencion pa pone un capa nobo di asfalt riba e ruta. Ademas, e ta solicita un indicacion di e fecha cu e trabou lo cuminsa y ki tempo ta proyecta pa su finalisacion.
“Nos infraestructura vial mester brinda siguridad y confianza na tur usuario. Ora un caminda di tanto importancia ta bira un fuente di preocupacion pa conductor y residente, ta deber di gobierno pa actua cu rapidez,” Bermudez a declara.
Parlamentario Bermudez ta expresa su speransa cu e preguntanan oficial lo contribui na un solucion rapido, pa asina garantisa un infraestructura di calidad, digno di un pais cu ta depende tanto riba mobilidad, turismo y siguridad vial.
Bermudez a conclui su declaracion cu e siguiente mensahe: “Cu union, dialogo y energia positivo, no tin reto cu nos no por supera.”
