Fraccion di AVP, representa pa parlamentario Clifford Heyliger, lider di fraccion Jennifer Arends-Reyes y parlamentario Stephany Sevinger, ta participa na Aruba Real Estate Summit 2026.
E summit ta un encuentro importante cu ta reuni representante di gobierno, sector inmobiliario, inversionista y otro actor clave pa dialoga tocante futuro di desaroyo na Aruba.
Pa fraccion di AVP, e dialogo no por trata solamente inversion y crecemento economico. E preocupacionnan cu ta biba den comunidad tambe mester ocupa un lugar central, entre otro e prijs halto di cas, oportunidad pa famianan local pa cumpra of huur un cas, e crecemento di short-term rental y su impacto riba disponibilidad di vivienda.
“Desaroyo ta necesario, pero mester tuma lugar cu vision y responsabilidad. Nos mester percura pa e hoben y famia Arubiano tambe por haya un oportunidad husto riba mercado di vivienda,” segun Fraccion di AVP.
Otro tema importante ta un mihor distribucion entre construccion, proteccion di naturaleza y calidad di bida. Aruba tin espacio limita, y p’esey cada decision tocante desaroyo mester considera e impacto riba infrastructura, trafico, medio ambiente y comunidadnan existente.
Participacion na Aruba Real Estate Summit 2026 ta brinda Fraccion di AVP e oportunidad pa tende diferente vision, intercambia idea y sigui boga pa solucionnan mas sostenibel. Crecemento economico mester crea oportunidad y prosperidad, pero semper cu interes di pueblo di Aruba central.
