E situacion pa cu costo di bida y poder di compra na Aruba ta alarmante, caminda tanto Banco Central di Aruba (BCA) como Central Bureau voor de Statistiek (CBS) ta bati alarma pa e crisis cu tin na e momentonan aki. Tur caminda tin sla di prijs na Aruba. Den e ultimo aña, e prijsnan di productonan den tur sector a conoce un aumento drastico. Mientras cu e gobierno actual a priminti e pueblo cu lo baha e costo di bida, cu lo yena e frishidernan bek y cu lo mehora e poder di compra, e realidad di awe ta totalmente otro.
Parlamentario Dangui Oduber ta subraya cu e datonan aki ta confirma e situacion di crisis severo cu nos isla ta biba aden, unda te hasta e productonan den canasta basico a conoce aumento y ni esaki no ta scapa na man di e gobierno aki!
Canasta basico tampoco ta scapa
E bista analitico riba nos Canasta di Consumo ta cuadra cu e realidad cu nos ta sinti tur dia den nos cartera pa e ultimo aña:
- Mas di mita (55.4%) di tur producto a conoce un aumento di prijs, locual ta e motibo principal pakico nos costo di bida a subi asina hopi.
- Un tercera parti (32.6%) di e productonan a bira mas barata, pero esaki no tabata suficiente pa wanta e subida di prijs general.
- E resto (12%) di e productonan a keda mesun prijs.
Na final di dia, e prijs di tanto nos bienes como e servicionan cu nos ta uza a registra un aumento di un poco mas di 2%. E cifranan aki ta ratifica e realidad cu nos ta biba: e prijsnan cu ta subi ta surpasa esnan cu ta baha.
Encuesta di BCA ta confirma pesimismo den economia local
E inflacion persistente y e aumento den e gastonan diario ta afectando e poder di compra di e hogarnan Arubano, locual a debilita e confiansa den nos economia y a pusha e bienestar di e famianan mas atras compara cu seis luna pasa.
Segun e resultado di e mas reciente Encuesta di Confiansa di Consumidor di Banco Central di Aruba (BCA), e Indice di Confiansa di Consumidor a baha cu 3.7 punto, cayendo te na 92.7. E datonan aki ta mustra cu consumidornan ta sigui pesimista tocante e situacion economico actual y e expectativa pa e futuro cercano. Segun BCA, tanto e percepcion di e situacion economico actual como e expectativa pa e proximo lunanan a registra un deterioro durante e periodo evalua.
Un di e preocupacionnan principal cu a sali for di e encuesta ta e expectativa cu prijsnan lo sigui subi; no menos cu 96% di e consumidornan consulta ta spera cu e costo di bida lo ta mas halto den e siguiente seis lunanan.
Aumento di e Bestaansminimum
Den e ultimo diesdos (12) luna, e bestaansminimum pa un hogar consistiendo di dos (2) adulto y dos (2) mucha (edad 0-14) a registra un aumento di Afl. 131, di Afl. 5,510 na mei 2025 pa Afl. 5,641 na mei 2026. E aumento aki a ser causa principalmente door di aumentonan den e sectornan di “Cuminda y bebida no-alcoholico” (Afl. 80) y “Transporte” (Afl. 27).
Mientras pueblo ta warda desesperadamente pa alivio, ministernan ta fiesta, biaha y sigui gasta placa di pueblo; Minister Gerlien Croes so a biaha no menos cu 15 biaha den 14 luna di trabou.
Awe, despues di e 14 lunanan aki, no tin caminda mas pa sconde pa e sla di prijsnan aki na Aruba. E situacion no a bira mihor manera a ser priminti; al contrario, e situacion a bira hopi mas pio.
Mientras e inflacion ta debilita nos famianan, e indiferencia di e gobierno ta suta e pueblo!
