Diamars Banco Central di Aruba (BCA) ta publica e di diescuatro edicion anual di su FINANCIAL SECTOR SUPERVISION REPORT (FSSR), cual ta coincidi cu su di 40 aniversario.
Mescos cu den añanan anterior, e Financial Sector Supervision Report di BCA ta ofrece un perspectiva detaya di e ehecucion di su mandato di supervision. Tambe e ta repasa e cambionan den e cuadro di regulacion y supervision y ta crea un bista riba e desaroyonan mas importante dentro di e sector financiero Arubano.
Manera ta resalta den e rapport, e sector financiero a keda solido y resiliente. E reservanan cu e institucionnan bou supervision ta mantene ta suficiente halto pa por absorba shocknan economico severo. No obstante di esey, e riesgonan geopolitico y operacional cu a aumenta ta rekeri vigilancia continuo pa garantisa e stabilidad di e sistema financiero.
Tambe e rapport ta yama pa accion urgente pa inicia cu e preparacionnan pa e siguiente evaluacion mutuo di CFATF den 2030 unda cu Aruba su marco pa preveni y combati labamento di placa, financiamento di terorismo como tambe financiamento di armanan di destruccion masal lo wordo evalua contra e normanan aplicabel di FATF. Esaki ta encera mas fortificacion y ampliacion di e legislacion actual riba e tereno aki como tambe e ehecucion di un evaluacion nobo y amplio di e riesgonan nacional (e asina yama “National Risk Assessment” (NRA)), pa asesora e riesgonan di criminalidad financiero pa Aruba. E ehecucion di un NRA nobo ta necesario pa tuma e medidanan preventivo en cuadro di e profiel di riesgo di Aruba y pa aplica un enfoke basa riba riesgo di peligernan identifica, unda lo aloca e recursonan limita na e areanan di mas vulnerabel.
BCA ta keda profundamente comprometi na mantene un sector financiero solido, di bon reputacion y resiliente, cu ta beneficia e crecemento economico.
E FINANCIAL SECTOR SUPERVISION REPORT 2025 ta disponibel desde awe riba e website di BCA, esta www.cbaruba.org
