Un pais no por sigui avansa, ora e decisionnan cu tin impacto grandi riba e economia, empleo y futuro di cuantioso di famia ta tuma unilateralmente, sin un debate publico y sin un vision integral. Esaki tabata e mensahe contundente di lider di fraccion di PPA, Eduard Pieters, durante su intervencion den Parlamento tocante e ceramento di e camindanan na costa parti noord di Aruba.
Democracia no ta traha asina.
Pieters a expresa su descontento cu Presidente di Parlamento unilateralmente a dicidi pa cambia un peticion di Reunion publico pa un Encuentro Publico, unda e tempo pa presenta e argumentonan y haci pregunta tabata sumamente limita.
“Pa un tema di e magnitud aki, seis minuut no ta suficiente. Democracia no ta traha asina.”
Segun e parlamentario, e debate no ta solamente tocante un caminda cera y ta obstaculisa economia di decenas di compania di tour. Ta tocante e manera con gobierno di nochi pa mainta ta tumando e decisionnan cu ta afecta directamente e bida di nos ciudadanonan.
Naturalesa y economia no mester enfrenta otro.
PPA a enfatisa cu e partido semper a defende proteccion di naturalesa. Esaki ta incluso un di e pilarnan di Plan Nos Aruba 2050, unda e balansa entre desaroyo economico y conservacion ambiental ta central.
Pero segun Pieters, proteha naturalesa no por converti den un argumento pa impone e decisionnan cu no tumando na cuenta e realidad economico di e hendenan cu diariamente ta depende di e area pa gana nan pan. Unda e dialogo cu e companianan aki a keda?
Segun Pieters: “Tin tata y mama di famia cu ta sali tur dia pa traha honestamente. Nan tambe mester ta proteha.”
Un gobierno cu ta manda e mensahenan contradictorio.
Pieters tambe a expresa tocante un contradiccion unda gobierno ainda no a splica su mes debidamente.
Mientras ta cera e camindanan segun meta pa conservacion, ainda tin diferente proyecto hotelero proyecta den parti di e mesun area.
“Pues, si realmente nos ta limitando acceso pa proteha naturalesa, con e vision ey ta cuadra cu mas desaroyo hotelero den e mesun zona?”
Segun e lider di PPA, pueblo merece un contesta hopi cla y honesto.
Sin plan, Aruba lo paga caro.
Pieters a adverti cu gobierno no por simplemente paralisa e proyectonan sin contempla e consecuencia legal y financiero.
Segun Pieters, si gobierno stop e proyectonan cu tin derecho legal sin un mecanismo cla pa compensacion, Aruba por enfrenta proceso hudicial cu eventualmente lo costa pueblo miyones di florin.
P’esey PPA ta propone un otro opcion: uza parti di e ingreso cu Aruba ya ta ricibi di turismo, pa crea un fondo cu ta permiti proteha e areanan natural, minimalisa y frena mas construccion di camber di hotel pa estadia di corto duracion den areanan di Noord, sin pone e carga financiero riba e pueblo posteriormente.
Gobernansa ta exigi vision, no reaccion.
Pa Parlamentario Eduard Pieters, e cuestion principal no ta si Aruba mester conserva su naturalesa. Riba esey no tin discusion. E berdadero debate ta, con nos haci esey.
“Un Estado di Derecho no por ta goberna cu e decisionnan unilateral. Mester percura pa un balansa real entre desaroyo social cultural, economico y preservacion di nos naturalesa. Esaki mester bay man den man cu transparencia, dialogo y un plan serio cu ta proteha tanto nos naturalesa como e futuro di e hendenan cu depende di dje pa biba.”
Paso, segun Pieters, un gobierno responsabel no ta scoge entre pueblo y naturalesa. Un gobierno responsabel tin e obligacion di proteha tur dos.
