Reino Hulandes ta drentando un capitulo hopi scur den su historia. Esaki ta momento cu Raymond Knops ta comportando su mes manera un DICTADOR, y a dicidi pa wanta placa di Sint Maarten pa e solo motibo di diferencia di opinion riba Coho.
Esaki ta un acto hopi baho y condenabel di Dictador Knops cu ta wordo sosteni pa Mark Rutte y Gobierno Hulandes.
Ta increibel pa mira cu e mentalidad Hulandes por a degenera dje forma aki, unda ta opta pa MATA un pueblo, sin ningun precupacion!
Parlamento di Sint Maarten ta bao precion increibel, unda nan no tin mas e libertad pa pensa y dicidi, sino cu Dictador Hulandes kier menasa nan y impone con nan mester pensa, usando un saco di placa pa chatagea nan.
Kico te caso?
Parlamento di Sint Maarten a wordo poni bao precion pa accepta COHO pa por haya placa. Pero nan no tabata di acuerdo y a ta sinti cu loke ta sosodiendo no ta lo corecto. Un consensus cu pistol na cabes, no ta consensus!
Carta pa Naciones Unidas:
Parlamento di Sint Maarten a manda un carta pa reclama e maltrato di Dictador Knops na Nacion Uni basa riba derecho humano y racismo. Esey a pone e dictador su fuse bula, cu el’a dicidi pa MATA e pueblo, y no manda e placa. El’a wanta e placa pa UN CARTA cu e no a gusta!
Exigi pa retira carta:
Awor Dictador Knops ta exigi Parlamentarionan pa hala aden e carta cu a bay pa Nacion Uni y mientras nan no hasi esey, e lo no manda placa.
Comportacion di dictador:
Aki claramente por conclui cu Knops a bira dictador, pasobra loke e ta hasiendo, ta contra tur regla democratico y di libertad di expresion y libertad di opinion. E actonan aki di Knops ta cruca tur liña di un Estado di Derecho y democracia.
Viola promesa haci dor di parlamentarionan:
Parlamentarionan ora di tuma nan stoel nan a huramenta, a hura di lo hasi nan trabao, SIN, ningun interferencia aheno. Ley di parlamento ta bisa cu parlamentarionan no mag wordo stroba den ehecuta nan trabao. Nan mester hasiele liber, sin menasa, chantage, of sin wordo movi dor di tercera.
Dictador KNOPS mester wordo keha:
Ora bo ta humiya un parlamento, impone riba nan pensamento, exigi pa hala carta aden, ta un kiebro serio di democracia.
Mal ehempel:
Dictador Knops a resulta den un mal ehempel totalmente. Pesey mes Raad van State a cera su boca pe, pero dor cu e ta un dictador y abusador, e no kier accepta. Sorto di hende asina ta wordo yama “mal perdedor”.
Ta ora pa e baina di Knops aki den islanan Sint Maarten, Curacao y Aruba wordo atendi y pone un paro na e dictador aki, cual no ta un comportacion sano pa ningun comunidad.
Ta tarea di e representantenan di Hulanda na e islanan, cuminza wak e desaroyo peligorso aki, prome cu e situacion escala.
Tur hende sa cu e islanan mester ayudo! Y tur hende ta contra e sistema cu Knops kier bin cune. Ta repudiabel cu Hulanda por hinca den su cabes pa maltrata Sint Maarten, dor di wanta nan placa (laga nan muri) solamente pasobra nan kier denuncia e “consensus cu pistol na cabes” y imponi riba nan, contra nan boluntad.
