Prome Minister Mike Eman, hunto cu su delegacion, a tene un encuentro bilateral cu presidente di Paraguay, Santiago Peña, na Lima. E reunion a tuma luga den cuadro di e bishita oficial di Prome Minister na Peru pa instalacion di presidente Keiko Fujimori
Durante e dialogo, ambos mandatario a expresa interes pa fortalece e relacion entre Aruba y Paraguay, cu enfasis riba conectividad aereo, comercio, turismo y exportacion di producto paraguayo pa Aruba. Un di e temanan central tabata e posibilidad pa crea miho conexion entre Aruba y Paraguay, y mas cu e parti zuid di Sur America. Actualmente, falta di un conexion aereo ta un di e retonan principal pa desaroya e mercado Paraguayo.
A pesar di e limitacion aki, Paraguay ta un mercado cu potencial pa Aruba. Un proporcion halto di bishitante Paraguayo ta escoge pa keda den hotel durante nan estadia na nos isla. E perfil aki ta haci Paraguay un mercado atractivo pa sector turistico Arubano.
Interes den comercio y exportacion
Presidente Peña a expresa interes pa mira Aruba como un socio comercial y como un posible entrada pa producto Paraguayo den Caribe. Entre e productonan cu Paraguay tin interes pa exporta ta carni y otro alimento. Aruba su sector hotelero, cantidad grandi di turista y necesidad pa importa producto ta crea oportunidad pa establece un relacion comercial mas directo. E bilateral a permiti ambos delegacion explora con conectividad, logistica y demanda local por wordo analisa, cu e meta di identifica oportunidad concreto pa comercio.
Invitacion pa acercamento cu MERCOSUR
Presidente Peña a invita Aruba pa explora un acercamento y posibel forma di uni cu MERCOSUR, un blok economico di pais den Sur America cual Paraguay ta forma parti. Un acercamento cu MERCOSUR por habri oportunidad nobo pa Aruba den comercio, inversion y relacion cu mercado di Sur America.
Conectividad regional ta creciendo
Aunque Paraguay ainda tin conectividad limita cu Aruba, e red aereo entre nos isla y America Latina ta ampliando. Argentina a bira un mercado fuerte pa Aruba den e parti zuid di Sur America. Na nivel regional, Avianca ta opera 14 vuelo pa siman, mientras LATAM lo aumenta su frecuencia di 7 pa 10 vuelo pa siman. Copa Airlines tambe lo subi su operacion di 17 pa 19 vuelo pa siman. E aumento den conectividad regional por crea mas opcion pa biahero for di Paraguay y otro pais den e parti zuid di continente yega Aruba via e diferente centro di conexion.
UNESCO ta conecta Aruba y Paraguay
E relacion entre ambos pais a haya un significado adicional recientemente durante e sesion internacional di programa Man and the Biosphere di UNESCO na Hernandarias, Paraguay. Durante e encuentro internacional aki, Aruba a wordo aproba oficialmente como Reserva di Biosfera di UNESCO. E reconocemento ta inclui henter teritorio di Aruba y su area maritimo como parti di Red Mundial di Reservanan di Biosfera. Aunke Prome Minister di Aruba no tabata fisicamente presente na e sesion, nos pais a sigui y comparti e momento historico. E reconocemento ta confirma e compromiso di Aruba cu proteccion di naturalesa, sostenibilidad y un balance entre desaroyo economico y conservacion.
E bilateral entre Prome Minister Eman y presidente Peña a crea un base nobo pa fortalece e relacion entre Aruba y Paraguay. Ambos pais a identifica oportunidad den conectividad, turismo, comercio y sostenibilidad, cu potencial pa genera beneficio mutuo y acerca Aruba mas na mercado di Sur America.
