Recientemente Departamento di Agricultura, Cria y Pesca (DLVV) a tuma nota cu 4 Sorsaca tabata mustra mahos y tabata tin un parti berde den e carni cu ta duro. Nan tabata tin Pispis blanco ariba nan casca pafor cu por causa deformacion di e casca pero no cu esey lo a afecta nan paden. Pispis por transmiti virus, manera esun di Mosaico anto esey si por pone mata produci fruta chikito y duro manera den Papaya. DLVV a habri e frutanan aki pa revisa nan paden ariba presencia di bichi blanco of simiyanan madura pero hol paden. Bichi blanco lo tabata un prueba di presencia di e Musca di Fruta di Mediterraneo. Di 2016 DLVV a haya confirmacion di laboratorio di United States Department of Agriculture, National Identification Service por medio di e Caribbean Plant Health Directors. E simiyanan madura pero hol paden lo a mustra ariba presencia di e Maribomba Bephrata cu ta biba di e simiya y tambe yama Musca di Sorsaca. Heidweiller y van Buurt 2006 ta confirma su presencia na Curaçao y un para di aña pasa na DLVV a logra haya un pa fotografia. E por pone webo den e fruta hopi berde anto su larva ta bai biba den e simiya. Despues di pop como adulto for di e simiya e musca ta bolbe coba sali for di e fruta. Den tal caso por pasa cu un fungus color preto por invadi e fruta cu ta momifica e fruta. Esta e ta bira duro preto y no ta sigui crece te hecha. Na Surinam, según Heidweiller y van Buurt 2006, hendenan sa pone saco chikito di nylon, den forma di un net, rond di e fruta y asina evita cu e adulto por yega na e frutanan pa pone webo. E net ta permiti e fruta haña airo y luz di solo. E foyeto di Musca di Fruta di Mediterraneo ta bisa cu hende mester tapa frutanan na dos siman di hecha cu saco di papel pa e musca no haya unda pa pone su webonan. Igual e net di nylon lo tambe por yuda. Pa ambos ta conta tambe cu mester piki tur fruta cu cay di e mata y duna bestia di come. Si no tin bestia e ora manera ta maranan den un saco di plastic cu prome a supla yena cu aire y revisa si e tin buraco cu ta laga aire pasa, anto laga para den solo un dia henter pa siguiente dia composta den suelo. Frutanan ta hala rosea y den solo debi na e temperatura mas ainda pero si nan rosea ta corta pa un saco di plastic nan ta soda muri y hoga e bichinan di musca paden di nan.
Paden di e frutanan DLVV no a nota e bichi blanco pero tambe simiyanan cu ta mita blanco ainda. Ademas e sabor tampoco tabata dushi. Un di e 4 Sorsaca tabata un grandi cu tabata tin un buraco y echt a bira duro un banda y full molly na e otro. Esey tabata tin e calandernan ta sali. Calandernan ta probecha di e casca habri debi na un otro causante di e malesa. Calander ta un peste ora hende warda simiya. E Sorsaca aki tabata mustra cu e stengel su venenan ta mustra preto. E parti berde tabata duro cu beschim rond di e simiyanan. Sin embargo DLVV tampoco a haya simiyanan di Sorsaca cu bichi of hol pero muy probabel lo tabata e causante di unda e Calandernan por a drenta. E mita berde hecho pa DLVV ta un reacion di e Sorsaca ariba e presencia di e Musca di Fruta di Mediterraneo. Den Mango y Mispel tambe DLVV sa nota esey. E conclucion aki sin embargo ta preliminario ya cu literatura tocante e fenomeno DLVV no a haya. Ademas manera ariba bisa e Musca di Sorsaca tambe por causa momificacion di e fruta. Pa haya sa sigur DLVV lo mester a manda 4 fruta pa laboratorio afor pa revisa kiko por a pasa cu nan. Sinembargo pa DLVV esey lo tabata demasiado caro pasobra no ta asina tampoco cu ta un plantacion grandi di Sorsaca DLVV tin. Pa mas informacion interesadonan por yama DLVV por medio di number di telefoon 5858102 of email na info@santarosa.aw.
