Ta hopi cos tin ta sosode rond mundo, y serca nos tambe maldad, inmoralidad,falta di respet pa bida di hende,y oposicion contra Dios su naturalesa a aumenta. Cosnan cu ta duna hende miedo, pero nos Dios tey pa nos.
No lubida ora cosnan ta sosode na cas di bo bisinja, ta un aviso pa bo ta consciente, prepara y cuida locual cu bo tin. Y sera porta pa plannan di e enemigo.
Hesus a bisa algo pa nos tur tene cuenta cune:
Mi carnenan ta tende Mi bos, y Mi conoce nan y nan ta sigi Mi,y Mi ta duna nan bida eterna,y nan lo no perece nunca, y ni un hende lo no ranca nan for di Mi man. Mi Tata Kende a duna Mi nan ta mas grandi cu tur,y ni un hende no por ranca nan for di man di Mi Tata . Ami y e Tata ta un.( Juan 10:28-30).
Hesus a bolbe bisa den Juan 14:1-4: No laga boso curaon bira intrankil, kere den Dios, kere tambe den Mi. Den cas di Mi Tata tin hopi lugar di biba, si no tabata asina, lo Mi a bisa boso, pasobra mi ta bay pa prepara un lugar pa boso. Y ora Mi bay y prepara un luga pa boso, lo Mi bin atrobe y ricibi boso serca Mi,pa caminda ami ta, boso tambe por ta. Y boso sa unda Mi ta bay,y e caminda boso sa.
Ta hopi profeta falso ta lanta den e ultimo temponan aki y ainda falta, pero laga nos tur keda corda cu e dia ni e ora di e binida di Cristo Hesus ningun hende no sa.
Asina ta cu no laga ningun hende ganja bo cu anja, ni dia , ni ora.
E plan di e spirito di anticristo cu ta move riba e mundo aki ta pa ganja hende y trece gran decepcion, pa asina hasta esnan cu ta riba e caminda, fria y aleha for di caminda, di Senjor.
No ta algo chikito e enemigo tin prepara, pasobra e sa cu su dianan ta serca y cu Cristo Hesus ta na caminda.
Laga nos yama danki na Dios, cu Dios tin nos man tene, si asina mes ta Dios tin nos man tene, pasobra e man cu nos tin no tin e forsa necesario pa gara y para contra tur e atakenan cu ta bini contra nos, pero Dios tin nos man tene. Corda cu e palabra di Dios ta bisa cu E a stima nos prome.
Dios tin nos den su planti man. E ta e sombra na bo man drechi ( Salmo 121:5).
For di testament bieu E a cuminsa bisa nos: No tene miedo pasobra Mi ta cu bo, no desmaya, pasobra Mi ta bo Dios, Lo Mi fortalesebo,si lo Mi yuda bo, si, lo Mi sostene bo cu e man drechi di Mi Husticia. ( Isaias 41:10).
Pasobra Ami ta Senjor bo Dios,Kende ta sostene bo man drechi, Kende ta bisa bo, no tene miedo Mi ta yuda bo.( Isaias 41:13).
Sinembargo, mi ta constantemente serca Bo, Bo a cohe mi man drechi tene, Cu Bo conseho, lo bo guiami, y despues ricibi mi den Gloria.( Salmo 73:23-24).
Ta ora pa nos para firme den Senjor, mantene nos oracion, sea fiel den bishita cas di Dios, haci hopi oracion pa nos famianan, pasobra di berdad e dianan ta trabahoso, y e respet pa Dios a cay hopi, y tambe pa nos prohimo.Materialismo kier domina mundo.
Hesus a bisa ; Cielo y tera lo pasa, ma Mi palabranan lo no pasa.
Sinceramente, Pastor Marcel Balootje
