Club Kibrahacha a reuni un grupo di adulto mayor activo durante su tradicional Summer Camp, un iniciativa cu ta promove bienestar, socialisacion y participacion activo den comunidad. Durante e actividad drs. Mervin Wyatt-Ras, Minister di Salubridad, Asunto Social, Cuido di Adulto Mayor y Maneho di Adiccion a bishita e grupo pa comparti un momento agradabel y expresa su aprecio pa e participantenan y e organisadornan.
Den su palabra, e minister a destaca cu adulto mayor merece sigui disfrutando di un bida digno, activo y yen di oportunidad pa participa den sociedad. El a enfatisa cu Gobierno ta sigui traha pa crea condicionnan caminda calidad di bida y bienestar di nos ciudadano di edad respeta ta keda un prioridad.
“Nos ta kere den un sociedad caminda tur hende por sigui participa activamente y contribui na nos comunidad. Esaki ta inclui nos adulto mayor, cu nan experiencia y sabiduria ta sigui ta di gran balor pa Aruba,” Minister a expresa.
Durante su bishita, Minister Wyatt Ras tambe a intercambia pensamiento cu e directora di Club Kibrahacha Janely Nicolas riba e diferente actividadnan cu e club ta organisa pa promove bienestar y participacion activo di adulto mayor. E directora a comparti cu e Summer Camp ta desaroyando satisfactoriamente y cu e reaccion di e participante nan ta hopi positivo. Tambe a expresa su gratitud pa e interes cu Ministerio di Asuntonan Social ta mustra den e iniciativa y pa e apoyo na organisacionnan comunitario cu diariamente ta contribui na bienestar di nos adulto mayor.
Di su banda Minister tambe a gradici Club Kibrahacha pa e compromiso cu nan ta mustra diariamente pa brinda actividadnan recreativo, social y educativo cu ta contribui na bienestar fisico y emocional di e participantenan.
Gobierno di Aruba ta reconoce e importancia di iniciativanan comunitario manera e Summer Camp di Club Kibrahacha, pasobra nan no solamente ta fortalece salud y participacion social, sino cu tambe ta crea espacio unda amistad, respet mutuo y sentido di pertenencia ta florece.
Minister Wyatt Ras a conclui deseando tur participante un agradabel continuacion di e actividad y a reafirma cu Gobierno lo sigui apoya iniciativanan cu ta contribui na un Aruba caminda adulto mayor por biba cu dignidad, calidad di bida y participacion activo.
