Si bo lesa Bijbel y pone bon atencion na locual cu bo ta lesa, bo ta mira cu e mesun cabrito cu Jacob a usa pa ganja Isaac su tata pa asina e hanja bendicion di Esau su ruman ( Genesis 27:9) asina tambe su yuinan a ganje ( Genesis 37:11) cu su yiu a muri usando sanger di un cabrito.
Mentira a drenta mundo ora satanas a usa e colebra pa ganja Eva.
Dicon net Eva?
Eva tabata e muhe cual Dios a papia di dje, pa multiplicacion di ser humano, y como diabel ta odia ser humano ( Juan 10:10) e a ataka Eva pensando cu asina e por stroba e proposito di Dios.
Pero Dios a bolter cos, pasobra Dios ta pordona, y Dios a usa un muher pa trece su Yiu Cristo Hesus na mundo, y Kende ta esun cu lo trapa y destrui e diabel por completo
Mentira su bida ta cortico, y berdad ta dura pa semper, mentira ta causa dolor y hasta ta ocasiona morto, pero berdad ta trece bida ,libertad goso y felicidad.
E Spirito di mentira ta moviendo tur caminda, y hende ta laga diabel usa nan, pasobra diabel ta e mentiroso for di principio, y esey nos ta nota cu maske cuanto hende ta scucha e berdad toch nan ta sigi cu mentira.
Nos hubentud mester di ayudo urgente, pasobra nan ta tende, no droga, no bebe, no cana cu arma, no horta, no bende droga, pero e spirito di mentira ta hinca den nan cabes cu nan por hacie y keda bon fisicamente.
Actualmente tin hopi hende malo, na caminda di dokter of viahando di pais pa pais y tur locual nan ta tende ta, e cantidad di droga y alcohol cu bo a usa den pasado tin bo stoma, nier, pulmon y higra na peliger. Esaki ta consecuencia di mentira cu hende a kere aden y cumpra malesa pa nan curpa.
Despues cu Jacob a ganja su tata, e a bay biba serca su tio Laban y Laban a ganja Jacob pone traha siete anja pa casa cu su yiu muher y riba e anochi di casamento a cambia e yuinan.
Despues cu Hose su rumannan a ganja e tata cu Hose a muri, Hose a wordo hiba Egypto, caminda e esposa di Potifar tambe a ganja riba dje, Hose a keda mas cu 10 anja den prison inocentemente, pero despues e a sali pasobra Dios sake, e a bira Gobernador di Egypto y e mesun rumannan cu a ganja mester a bin busca cuminda serca dje.
Dios su husticia ta asina perfecto, cu si bo ganja riba un hende, e cos lo sali na cla, pasobra Dios no ta sconde mentira. Dios ta lus y berdad, y den dj’E no tin nada, nada di scuridad.
Esun cu ta coba un pos lo cay aden, y esun cu bolter un piedra,piedra lo lora bin bek riba dje.( Proverbionan 26:27).
Un testigo falso no ta keda sin castigo,y esun cu ta papia mentira no ta scapa.( Proverbionan 19:5).
Un hipocrit ta destrui su prohimo cu su boca,ma pa medio di sabiduria e husto lo wordo libra,(Proverbionan 11:9).
Lo no pasa nada malo cu e husto, ma e malbadonan ta yena cu problema. ( Proverbionan 12:21).
Pa motibo di mentira tin hopi violencia, bao di nos hubentud, y tristesa den hopi famia.
Te ainda tin hopi hende cu ta casa cu no kier comprende cu adulterio no ta plan di Dios.y nan ta sigi ganja na mes.
Rechasa mentira, y busca e berdad di Dios,
Sinceramente, Pastor Marcel Balootje
