Cuerpo Policial Aruba (KPA) a conmemora su 40 aniversario cu un Santo Sacrificio di Misa na Misa Pro Cathedral San Francisco na Playa, den presencia di Su excelencia Gobernador, autoridadnan, invitadonan special y un cantidad grandi di miembro di comunidad. E celebracion a forma un momento di reflexion, gratitud y oracion pa tur miembro di Cuerpo Policial Aruba y pa pidi proteccion continuo den nan importante labor na servicio di pais.
Presente na e misa tabata, entre otro, Gobernador di Aruba Alfonso Boekhoudt, Minister di Husticia mr. drs. Arthur Dowers, Korpschef di KPA Ramon Arnhem, Vicepresidente di Parlamento Muzaninn Wever, miembronan di Parlamento, alto funcionarionan di sector di husticia, diferente hoofden van dienst, pensionadonan di Cuerpo Policial y delegacionnan invita for di diferente pais.
Na final di e celebracion religioso, Minister Dowers a dirigi palabra na esnan presente y a felicita Cuerpo Policial Aruba cu e logro importante di 40 aña.
Minister a indica cu durante cuatro decada hopi cos a cambia. Uniform, manera di traha, liderazgo y e propio realidad di criminalidad a evoluciona. Criminalidad ta bira mas compleho y ta busca continuamente forma nobo pa opera, loke ta exigi cu Cuerpo Policial tambe sigui modernisa y adapta su capacidad.
Sin embargo, segun Minister Dowers, tin un principio fundamental cu no por cambia: integridad.
El a enfatisa cu un cuerpo policial integro ta esencial pa funcionamiento di un estado democratico y pa conserva confiansa di comunidad. Ora fayo presenta dentro di un organisacion, e responsabilidad ta pa atende cu esaki na un manera transparente, siña for di dje y sigui fortalece e institucion.
Minister Dowers a dedica atencion tambe na un di e retonan mas grandi cu Cuerpo Policial Aruba ta enfrenta actualmente: falta di personal. El a indica cu Aruba actualmente tin menos polis compara cu aproximadamente 10 aña pasa, mientras cu e demanda y complehidad di trabou policial a aumenta.
E situacion aki ta pone un peso adicional riba e miembronan actual di KPA, incluyendo polisnan cu ya ta den e ultimo fase di nan trayectoria profesional.
Den e cuadro aki, Minister Dowers a expresa un compromiso di parti di Gobierno pa sigui inverti den capacidad humano di Cuerpo Policial.
“Di e luga aki mi ta compromete mi mes, hunto cu Gobierno, pa nos percura pa recluta mas grupo di polis,” Minister Dowers a expresa. E meta ta pa incorpora mas hende hoben, prepara nan debidamente y crea un generacion nobo cu gradualmente por carga responsabilidad dentro di e cuerpo.
Minister a indica cu Gobierno ta consciente di e presion cu actualmente ta existi dentro di KPA y cu fortalecemento di e cuerpo mester inclui tanto reclutamento como formacion adecuado di futuro polisnan.
E celebracion di 40 aniversario a conta tambe cu presencia di delegacionnan policial di Hulanda, Corsou, Boneiro, Saba, St. Eustatius, Sint Maarten y Suriname. Minister Dowers a duna nan un bonbini special y a destaca cu nan presencia ta simbolisa no solamente sosten, sino tambe e compromiso comparti pa combati criminalidad tanto local, dentro di Reino, como internacionalmente.
Despues di e misa, e diferente cuerponan a participa den un desfile oficial cu a pasa dilanti Bestuurskantoor. E delegacion oficial, incluyendo Minister Dowers, a ricibi e desfile y saluda e diferente cuerponan participante.
E programa a continua despues cu un lunch na Renaissance Ballroom, como parti di e actividadnan conmemorativo di e 40 aniversario.
Na final di su discurso, Minister Dowers a felicita Korpschef, liderazgo, miembronan activo, pensionadonan y henter Cuerpo Policial Aruba pa nan aporte durante e ultimo 40 aña. El a desea nan un bon siman di celebracion y actividadnan, den un ambiente di camaraderia hunto cu e delegacionnan bishitante.
Cu 40 aña di historia tras di lomba, e celebracion ta marca no solamente un momento pa mira bek riba e trayectoria di Cuerpo Policial Aruba, sino tambe pa mira dilanti: fortalece integridad, inverti den un generacion nobo di polis y prepara KPA pa e retonan di siguridad di futuro.
