Un gran mayoria di e pueblo di Aruba ta sinti cu e gobierno actual no ta cumpliendo cu e promesanan di campaña ni ta trahando pa e bienestar di e ciudadano comun.
Solo di Pueblo ta interpreta e resultado aki na nos forma, despues di a scucha comunidad.
Un resultado cu a conmove e panorama politico di nos isla a keda revela recientemente pa e portal di noticia independiente Noticia Cla. Segun e ultimo encuesta neutral realiza entre un amplio grupo di ciudadano, rond di 75% di e pueblo di Aruba a expresa di ta mal contento cu e trabounan y e maneho cu Gobierno ta hiba na e momentonan aki.
E cifranan aki ta manda un señal cla y fuerte pa e lidernan na mando: e gran mayoria di e pueblo no ta constata cu Gobierno ta cumpliendo cu su compromiso—ni tampoco cu e ta trahando na fabor di e comunidad. E sentimento di frustracion y desencanto ta domina e casnan di famia na Aruba.
E Factornan Clave Tras di e Discontento Generalisa
Analisando e reaccion di e ciudadanonan y observando nos realidad social, tin varios punto crucial cu a hiba na e desaprobacion halto aki:
Costo di Bida Impagabel y BBO: E aumento continuo den e canasta basico ta haci cu e sueldo mensual di e trahador no ta alcansa mas. E pueblo ta sinti cu no tin alivio economico real.
Falta di Resultado Visibel: Tin un percepcion fuerte cu Gobierno ta keda unicamente den palabra, reunion y promesanan, sin cu esakinan ta traduci nan mes den proyectonan concreto of mehoracion den infrastructura, scol y barionan.
Crisis y Desesperacion den Cuido di Salud (AZV): Lista largo di espera, falta di remedi y e falta di dokternan di cas a crea un ambiente di inseguridad pa e enfermonan y e hendenan grandi. Dokternan mes a trece dilanti cu debi cu a otroga mas permiso, e bishitanan di dokter a aumenta, causando mas tardansa pa cuidadano por mira dokter o specialista.
Falta di Transparencia y Gobernacion Limpi: E ciudadano ta sigui cuestiona e uzo di e recursonan publico y e falta di claridad den tumamento di decisionnan di peso pa e pais.
Un señal di alarma politico
E resultado aki di Noticia Cla ta un señal di alarma corra pa e gobernantenan. E nivel di discontento aki ta refleha un kiebro profundo entre e prioridadnan di e politiconan na mando y e necesidadnan diario di e ciudadano comun na Aruba. E pueblo ta spera accion y no mas palabra.
Prome Minister di limpiesa?
Hopi ta opina cu Prome Minister Mike Eman ta bon pa bira director di Serlimar. Ya cu e gusta haci limpiesa, e por hunga un bon rol na dicho instancia. E rol di dje como prome minister lo mester ta otro. Pero no ta tume na malo, pero solamente cu e por yuda na Serlimar, mirando cu di berdad e tin un pasion pa tur loke ta limpiesa.
