Minister di Educacion y Deporte, sra. mr. Gerlien Croes, a haci entrega di 20 tablet nobo y un laptop pa nos instructornan di landamento, como parti di e esfuerso pa facilita y modernisa nan trabou diario. Na mes momento, Ministerio a brinda sosten pa uniform nobo pa e instructornan.
E materialnan nobo lo contribui na un forma di traha mas eficiente y brinda e instructornan e hermentnan necesario pa sigui cumpli cu nan responsabilidad importante den educacion y desaroyo di nos muchanan.
Paralelamente, Minister Gerlien Croes ta den dialogo cu Departamento di Recurso Humano (DRH) pa atende e posicion huridico di e instructornan di landamento.
“Despues di tanto aña, ta importante pa atende y regla e posicion huridico di nos instructornan. Nan ta cumpli cu un tarea importante y merece tambe pa e aspecto aki haya e atencion necesario”, Minister Gerlien Croes a expresa.
Cu inicio di e aña escolar nobo, Minister Gerlien Croes ta gradici tur instructor di landamento pa nan dedicacion, compromiso y e trabou cu nan ta desplega diariamente.
“Danki na cada un di boso pa e trabou importante cu boso ta haci. Deseando boso hopi exito den e aña escolar nobo. Nos ta sigui traha pa brinda boso e hermentnan y condicionnan necesario pa por sigui haci diferencia”.
Ministerio di Educacion y Deporte ta sigui comprometi pa fortalece tanto e condicionnan di trabou como e recursonan disponibel pa profesionalnan cu diariamente ta contribui na educacion y desaroyo di nos muchanan. Exito na Landamento Escolar durante aña escolar 2026-2027.
