Minister di Educacion y Deporte, Minister sra. mr. Gerlien Croes, a anuncia y oficialisa cu Colegio Santa Filomena a bira e prome scol na Aruba pa ricibi e structura multi-deportivo nobo, diseña pa brinda alumnonan oportunidad pa practica tanto basketball como futbol den nan propio ambiente escolar.
E inauguracion ta marca inicio di un proyecto mas amplio, ya cu Colegio Santa Filomena ta e prome entre un serie di scolnan rond Aruba cu pronto tambe lo ricibi e structura multi-deportivo aki. E proyecto ta wordo realisa den cooperacion cu Lotto pa Deporte y otro partnernan, cu e meta comun di sigui crea mas oportunidad pa actividad fisico y deportivo den nos scolnan.
Segun Minister Gerlien Croes, e iniciativa ta conecta dos area importante: educacion y deporte. Creando facilidadnan deportivo accesibel na scol, alumnonan ta haya mas oportunidad pa move, recrea y practica diferente disciplina durante nan trayectoria escolar.
“Nos kier crea espacionan sano, recreacional y deportivo den nos scolnan, caminda nos muchanan por descubri y sigui desaroya nan talento. Deporte na scol por ta e prome paso pa identifica e alumno-atletanan cu mañan por destaca tanto local como internacionalmente,” Minister Gerlien Croes a expresa.
E structura multi-deportivo ta brinda e posibilidad pa alumnonan practica basketball y futbol na scol y, na mes momento, ta contribui na promove un estilo di bida activo. E intencion ta pa deporte bira un parti cada bes mas presente den ambiente escolar y asina completaG e desaroyo academico, social y fisico di e alumno.
Minister Gerlien Croes ta enfatisa cu Aruba tin hopi talento deportivo entre su mucha- y hobennan y cu ta importante pa crea e condicionnan necesario pa e talento ey por wordo descubri y desaroya desde edad hoben.
Cu Colegio Santa Filomena como prome scol, e proyecto ta oficialmente na marcha. Den e proximo periodo, mas scol rond Aruba lo ricibi nan propio structura multi-deportivo.
Ministerio di Educacion y Deporte ta gradici Lotto pa Deporte, Colegio Santa Filomena y tur partnernan cu ta contribui na realisacion di e iniciativa.
“Nos ta sigui inverti den espacionan cu ta invita, inspira y motiva nos muchanan pa move, practica deporte y descubri nan potencial. Cada cancha nobo na un scol ta un oportunidad mas pa un talento por nace y crece”.
