E palabra aki ta un yamada pa sinceridad. Hesus no ta mira solamente nos apariencia sino nos curason. Nos por mustra bondad di pafo, pero si nos alma no ta yena cu amor, nos ta perde e esencia di humildad. Dios conoce nos intencionnan, nos desicionnan y e cosnan cu nos ta haci hasta ora ningun hende ta wak nos. Pero e mensahe no ta pa duna nos miedo sino pa inspira nos pa biba cu transparencia cu Dios. Nos ta confia cu Dios ta limpia nos curason y cu E ta duna nos un oportunidad nobo pa cada dia bira mas util pa Su Reino. Laga nos curason refleha e mesun luz cu nos ta predica. Pa nos por ta mas humilde y mas real den e amor di Dios. Nos no kier ta e grafnan cu ta cana rond cu curason morto cu ta carga cosnan di pasado. Nos kier ta transforma di paden, pa por biba cu proposito y ta un bendicion pa otro.
Oracion: Señor, kita for di mi curason tur loke no ta real. No laga mi busca pa agrada hende, sino Abo Señor. Duna mi e balentia pa biba cu sinceridad, pa mi palabra y accionan refleha e amor cu ta bini di Bo. Purifica mi pensamento, intencion y deseonan, pa mi por bira un testimonio di luz. Amen.
