For di den Deuteronomio 6:6-7 Bijbel ta mustra nos cu nos mester pasa e palabra y oracion over pa nos yiunan, pa henter nos cas, pa henter nos famia, pa nos generacion.
E tempo cu nos ta bibando aden ta un tempo trabahoso, no solamente pa hende grandi, pero tambe pa mucha, pasobra tin peliger y mal influencia tur caminda.
Antes nos por papia cu un mucha, y bise cu tal cos na tv ta malo, no lesa tal buki, pero awor e mal influencia a wordo reparti den tur sorto di cos, hasta den e propio telefon cu nos tur ta usa diariamente.
Weganan cu muchanan ta hunga, ta bini yena cu violencia y palabra malo, y hasta cu bruheria y satanismo.
E cos ta asina aki cu e diabel kier gana curason di mucha y hoben, pa asina e por husanan pa maldad.
Cuanto hoben no ta pose cu arma di candela, of ta usa palabranan ofensivo contra otro y despues e resultado ta sali den prensa, sea nan a kita bida di hende of hende a kita nan bida.
Ta tempo pa nos tuma e asunto aki na serio, pasobra dia pa dia mas victima di maldad, malicia y inmoralidad ta cay den nos hubentud.
No solamente nos mester haci oracion pa nos yiunan, pero nos mester sinja nos yuinan, haci oracion, guia nos yuinan den caminda di Dios, mescos cu nos ta sinja nan come, pa nan tin forsa, pasobra nan tin cu enfrenta bida tur dia, y e situacion mundial di mundo ta hopi scur,
Nos hobennan ta pasando den un tempo cu nan mester sobrevivi hopi tipo di atake riba nan bida, y si palabra di Dios ta bisa pa haci oracion, esey ta nifica, cu di berdad mester sinja nos hobennan pa haci oracion.
E influencia di maldad ta asina grandi cu hoben por cay den depresion, hoben por tin stress, no laga nos bisa cu ta hoben e ta y nada no ta pasa. Corda cu e ladron a bin pa mata, horta y destrui y esey ta conta pa tur hende igual.
E influencia di alcohol, droga, pornografia, violencia, cana cu arma ta hopi grandi, pa falta di conocemento di e palabra di Dios.
Rabia ta domina un mucha hopi facil, ora e no tin un bida di oracion, pasobra e ta mustra manera no tin salida, si no tin violencia.
No conta mes e bida emocional cu hubentud ta bibando, den cual nan mester demostra ken nan ta y kico nan por, y esey hopi biaha por costa libertad y hasta bida.
E necesidad di oracion ta grandi, pa pas y trankilidad, pa sabiduria, pa amor, pa pordona, y respeta bida di otro.
Oracion tambe ta trece temor di Dios, bao di hobennan, y asina nan ta aparta for di maldad.
Cada skina cu hende por bira tin algo di maldad, algo di mal influencia ta loer pa nos hubentud.
Nos no por sinta mas crusa, y pensa cu scol y internet por haci e trabao cu nos como mayor tin cu haci na nos cas.
Nos como mayor mester pone tempo disponibel, pa haci oracion, pero tambe nos ta roga tur mayor sinja bo yiu haci, oracion, pasobra un mucha por tin tur cos , pero si su defensa spiritual ta bao, e por cay pa mal influencia.
Laga nos pidi Dios pa pone un cura di protecion rond di nos hubentud, y haci nan consiente, cu di berdad nos ta den un tempo malo y trabahoso.
Senjor nos ta roga bo pa proteha nos muchanan.
Sinceramente, Pastor Marcel Balootje
