Miembronan di Parlamento Evelyn Wever-Croes y Rocco Tjon a manda awe un carta formal na Minister Gerlien Croes, pasobra e plazo legal pa tuma un decision nobo riba nan bezwaar den e caso LOB a pasa sin cu e Minister a tuma un decision. Ta trata aki di e peticion di e parlamentarionan na e minister pa haya prueba di pago di e biahe di trabou den jet priva di 19 di november 2026.
Dia 10 di juli 2026, Comision di Obhecion di LAR a informa nan por escrito cu e conseho den e caso a wordo manda pa e Minister. Den e mes carta, e comision a informa cu e Minister mester tuma un decision nobo riba e obhecion dentro di seis siman. E plazo ey a pasa dia 21 di augustus 2026. Te awe, e Minister no a manda ningun decision nobo, ni tampoco un copia di e conseho di e Comision di LAR.
Den nan carta, Wever-Croes y Tjon ta pidi e Minister pa mesora, en todo caso dentro di 48 ora, entrega nan e decision nobo y un copia completo di e conseho di e Comision di LAR.
Nan ta haci referencia na articulo 20, di e ley di LAR (Landsverordening administratieve rechtspraak), cu ta determina cu, si e persona cu a presenta e obhecion ta pidi esey despues di e ultimo dia di e plazo, e mester ricibi un copia di e decision “terstond”, pues mesora.
“E plazo legal a pasa. Nos no ta pidi nada extraordinario. Nos ta pidi simplemente pa e Minister cumpli cu su obligacion legal: tuma un decision y duna nos e decision y e conseho cu a sirbi como base pa e decision,” segun Wever-Croes y Tjon.
Nan ta indica cu nan preferencia ta pa e caso wordo finalisa di un manera corecto y conforme ley. Si e Minister no responde dentro di e plazo di 48 ora, nan lo considera e siguiente pasonan legal disponibel bou di LAR. “Nos a pidi claridad pa 9 luna. Awor cu e plazo legal a pasa, e momento a yega pa duna e claridad.”
