Durante un conferencia di prensa, Minister di Finansa, Asunto Economico y Sector Primario, Geoffrey Wever, a elabora riba e cifranan preliminario di ehecucion di Presupuesto 2026. Conforme ley di supervision financiero, Departamento di Finansa ta compila cada kwartaal e Uitvoeringsrapportage (URK), cu ta duna un bista di desaroyo financiero di Pais Aruba y di e entidadnan cu ta forma parti di e sector colectivo, entre otro AZV, SVB, ATA, Serlimar, SEPB y Universidad di Aruba.
E cifranan preliminario pa e prome mitar di 2026 ta mustra cu ehecucion di presupuesto ta sigui den un direccion positivo y den linea cu e cuadro financiero estableci. Gobierno a ricibi mas entrada cu e premira y e gastonan di gobierno ta menos cu a premira. E resultado di e sector colectivo ta refleha e desaroyo conhunto di Pais Aruba y e diferente entidadnan involucra. Cu Presupuesto 2026 entrega na tempo y aproba pa Parlamento, Gobierno ta sigui monitorea e ehecucion de cerca y cumpli cu su obligacionnan di informacion y supervision financiero.
Minister di Finansa, Asunto Economico y Sector Primario, Geoffrey Wever, a indica cu e resultado ta confirma cu e linea di disciplina financiero, control di gasto y un economia cu ta sigui desaroya positivamente ta duna resultado.
“Nos obhetivo no ta solamente pa presenta bon cifra. Nos ta trahando pa crea un base financiero solido cu ta permiti Gobierno cumpli cu su obligacionnan, baha debe, proteha poder di compra y crea espacio pa sigui inverti den comunidad. E cifranan di e prome mitar di 2026 ta mustra cu Aruba ta sigui riba e caminda corecto, pero nos tin cu keda mantene e disciplina,” segun minister Wever.
Manera articulo 17 di e ley di supervision financiero ta stipula gobierno di Aruba ta manda e uitvoeringsrapportage pa Caft. Pa cumpli cu esaki, Departamento di Finansa ta compila cada kwartaal e Uitvoeringsrapportage, cu ta duna un bista di e ehecucion di presupuesto, desaroyo di debe, gastonan di personal y situacion financiero di e sector colectivo.
Te cu 30 di juni 2026, Gobierno a ricibi un total di Afl. 1,119 biyon na entrada. Esaki ta representa 56,6 porciento di e total di entrada presupuesta pa 2026. Na mes momento, gastonan total tabata Afl. 860 miyon, equivalente na 46.3 porciento di e presupuesto anual. E diferencia positivo entre entrada y gasto a resulta den un resultado preliminario di casi Afl. 260 miyon.
Compara cu e mesun periodo di 2025, entradanan di Gobierno a aumenta cu aproximadamente Afl. 86 miyon. Entradanan di impuesto ta mustra un desaroyo positivo. Te cu juni 2026, entradanan di directe en indirecte belasting destina pa Pais Aruba a yega Afl. 918 miyon, un aumento di 7 porciento compara cu e prome mitar di 2025.
Indicadornan di mas actividad economico ta mustra tambe un desaroyo positivo. Entradanan di BBO/BAVP a yega Afl. 232 miyon, un aumento di 8 porciento compara cu 2025. Entrada di toeristenheffing tambe a sigui crece y a yega Afl. 63,1 miyon, 18 porciento mas cu den e mesun periodo di 2025.
Un otro indicador importante ta winstbelasting. Den e prome mitar di 2026, Gobierno a ricibi Afl. 252,4 miyon na winstbelasting. Esaki ta e nivel mas halto registra pa e prome dos kwartaalnan den e periodo 2019-2026. Cerca di 90 porciento di e entrada aki ta bin di entradanan regular y structural relaciona cu resultado di empresanan durante 2025. E cifranan ta confirma cu actividad empresarial y economia di Aruba a sigui desaroya positivamente.
Minister Wever a enfatisa cu e aumento di entrada no ta wordo mira como un oportunidad pa aumenta gasto sin control. “Ora economia ta produci mas entrada, responsabilidad di Gobierno ta pa maneha esaki cu prudencia. Nos mester fortalece nos posicion financiero y na mes momento busca manera pa resultado di e bon maneho yega bek cerca comunidad.”
Den e prome mitar di 2026, gastonan total a yega Afl. 848 miyon. Aunke esaki ta Afl. 62 miyon mas compara cu e mesun periodo di 2025, Gobierno a realisa solamente 47 porciento di e presupuesto anual di gasto. Un parti importante di e aumento ta relaciona cu medidanan cu directamente ta beneficia comunidad, incluyendo e aumento extra di Afl. 150 pa luna den reparatietoeslag pa pensionadonan, cual a drenta na vigor 1 di januari 2026.
Tambe durante e periodo aki Gobierno a tuma medida pa limita e impacto di e aumento fuerte den prijs internacional di petroleo. Door di baha temporalmente e accijns riba gasolin y diesel, Gobierno a absorbe parti di e aumento pa proteha poder di compra di famianan y limita presion riba costo di bida y costo operacional di empresanan.
Apesar di e medidanan aki, ehecucion di presupuesto ta keda positivo y gasto ta keda dentro di e cuadro financiero.
Pa loke ta trata gastonan di personal of e public wage bill, e Uitvoeringsrapportage ta mustra cu den e prome seis lunanan ta na 4,19 porciento di PIB. Basa riba e tendencia actual, ta premira cu e gastonan di personal lo yega na 8,2 porciento di PIB, ampliamente bou di e norma maximo di 10 porciento estableci den LAft.
Pa loke ta trata e desaroyo di e debe, na fin di juni 2026, e debe di Pais Aruba tin un balor di Afl. 5,022 biyon, ekivalente na 62,2 porciento di PIB.
Durante e prome seis lunanan di 2026, Aruba a paga aproximadamente Afl. 345 miyon na debe. Segun e plan di financiamento, mas aflossing ta programa pa e resto di aña, locual ta pone cu e aumento observa den e di dos kwartaal tin un caracter temporal. Compara cu e di dos kwartaal di 2025, ora debe tabata 65,9 porciento di PIB, e nivel actual ta considerablemente mas abou.
Minister Wever a indica cu e resultado di e prome mitar di 2026 ta un señal positivo, pero no un motibo pa perde disciplina.
“Nos a logra progreso importante den saneamento di finansa publico, pero e trabou no a termina. Aruba ainda tin un debe significativo y nos economia ta sensitivo pa desaroyonan internacional. Pesey nos lo sigui cu un maneho responsable, sigui baha debe, mantene gasto bou control y usa e espacio cu nos crea pa fortalece poder di compra, economia y futuro di Aruba.” Minister Wever a comenta.
Minister Geoffrey Wever ta gradici Departamento di Finansa, Departamento di Impuesto, Departamento di Aduana y tur e departamentonan y entidadnan di sector colectivo cu ta contribui cu informacion pa compilacion di e Uitvoeringsrapportage.
