Cu e di dos edicion di Dia Nacional pa Cuida Aruba, programa pa diasabra awo 29 di augustus 2026, diferente instancia y partner ta bolbe uni forsa pa brinda comunidad e facilidadnan necesario pa deshaci di desperdicio, pero tambe pa percura cu e accion tuma luga den un forma organisa y sigur. Ta recorda comunidad tambe si ta desea mas informacion riba e actividad pa subi riba website: cuidaaruba.com pa asina tin un bista completo di ruta y localidad di e accion, pero tambe contesta riba cualkier pregunta relaciona cu e accion Cuida Aruba.
Durante conferencia di prensa, representantenan di WEB, CMO, BCI, DVG/GKMB, DTI y KPA a comparti informacion practico cu comunidad, cada uno for di su propio area di responsabilidad.
WEB ta sostene continuidad di Cuida Aruba
Director di WEB, ing. Alfredo Koolman, a indica cu despues di evalua e peticion pa sostene e iniciativa, WEB a dicidi di bolbe contribui na Cuida Aruba.
WEB a participa caba na e accion anterior na juli y, segun Koolman, e organisacion a dicidi brinda su aporte tambe durante e siguiente cuater edicionnan. El a expresa aprecio na e team interno di WEB cu a evalua e peticion y a haci posibel pa e compania sigui contribui na continuidad di e iniciativa.
E cooperacion aki ta forma parti di e esfuerso pa uni sector publico y otro partnernan rond di un meta comun: crea condicionnan pa Cuida Aruba por sigui tuma luga periodicamente.
Seis punto disponibel rond Aruba
Pa acerca e servicio na comunidad, diasabra lo tin seis localidad disponibel pa entrega desperdicio:
- Veld di Trupial, banda di Centro Medico San NicolasÂ
- Veld di baseball na Pos Chikito/BurubundoÂ
- Zona di Desperdicio na EcoTech BarcaderaÂ
- Veld di Arsenal na Santa CruzÂ
- Harbour Arena na OranjestadÂ
- Veld banda di Colegio Ora Ubao na Tanki LeendertÂ
E distribucion aki ta permiti pa habitantenan di diferente parti di Aruba haya un punto mas cerca pa entrega nan desperdicio.
Seguridad ta responsabilidad di tur participante
Director di CMO, Rino Hermans, a pone enfasis riba siguridad durante e accion. Su peticion na comunidad ta pa separa desperdicio corectamente, percura cu carga ta bon tapa y sigura durante transporte, y haci uzo di proteccion personal durante e trabounan.
Tambe lo tin asistencia disponibel pa atende situacionnan di emergencia cu eventualmente por presenta durante e accion, cu presencia di boluntarionan di Rode Kruis.
Director interino di DTI, Richella Dorothal, a reenforsa e mensahe di prevencion, specialmente pa boluntarionan cu lo pone man na obra. E recomendacion ta pa uza sapato sera y handschoen ora ta necesario, y proteccion adecuado ora trabou ta tuma luga na haltura.
E meta ta pa comunidad participa cu entusiasmo, pero sin pone nan mes of otro persona na riesgo.
KPA: transporta desperdicio den un forma sigur
Vocero di KPA, Liliana Rasmijn, a concentra riba siguridad den trafico y orden na e localidadnan di deposito.
KPA ta pidi comunidad pa no sobrecarga vehiculo y pa mara y tapa desperdicio bon prome cu sali riba caminda. Obhetonan cu ta sali for di vehiculo mester wordo marca adecuadamente pa otro usuarionan den trafico por mira e peliger na tempo.
Na e puntonan di deposito, KPA ta pidi pa participante sigui instruccion di e personanan encarga cu coordinacion y respeta e fila. Polis di bario lo ta presente na e diferente localidadnan pa yuda cu coordinacion, orden publico y siguridad.
Un Aruba limpi tambe ta un Aruba mas saludabel
For di perspectiva di salud publico, Jurette Croes vocero di DVG/GKMB a enfatisa cu e accion ta un oportunidad importante pa haci cura limpi, rond di cas y otro espacio caminda material y desperdicio por acumula.
Cu temporada di yobida, recipiente y otro obheto cu por acumula awa por bira criadero di sangura, aumentando riesgo di enfermedadnan transmiti pa sangura.
Desperdicio acumula por atrae tambe raton, djaca, kakalaka y otro plaga, creando condicionnan poco higienico rond di cas y den bario.
P’esey e invitacion ta pa comunidad haci uzo di e oportunidad di diasabra, no solamente pa contribui na un isla mas bunita, sino tambe pa proteha salud di nan famia y comunidad.
Limpiesa, pero cu orden y responsabilidad
E mensahe conhunto di e instancianan ta cla: participa, pero haci esaki cu siguridad y responsabilidad. Prepara e desperdicio bon, transport’e den un forma sigur, proteha bo mes durante e trabou y sigui instruccion na e punto di deposito.
Cu seis localidad distribui rond Aruba y diferente instancia mobilisando pa sostene e accion, Dia Nacional pa Cuida Aruba di diasabra awo 29 di augustus ta bolbe brinda comunidad un oportunidad concreto pa pone man na obra.
E resultado cu ta busca ta uno comparti: un Aruba mas limpi, mas sigur y mas saludabel pa nos tur.
