Gobierno di Aruba ta sigui cu preparacion y promocion di e di dos edicion di Dia Nacional pa Cuida Aruba, cu lo reuni sector publico, sector priva, organisacionnan y voluntarionan den un esfuerso conhunto pa contribui na un Aruba mas limpi, cuida y agradabel pa biba.
Durante conferencia di prensa, Prome Minister Mike Eman a enfatisa cu e iniciativa ta bay mas leu cu un accion di limpiesa. E meta ta pa gradualmente inculca den comunidad un sentido di responsabilidad comparti, caminda cuida Aruba a bira algo cu cada ciudadano ta sinti como parti di su propio responsabilidad.
“E ta un momento pa nos haci Aruba mas limpi y mas bunita, pero tambe pa pone den curason di cada ciudadano e sentido di responsabilidad comparti pa e pais aki cu ta di nos tur,” Eman a expresa.
Pa haci participacion mas facil, durante e accion di fin di luna lo tin diferente punto caminda comunidad por deposita desperdicio mas cerca di nan bario. Eman a recorda cu, adicionalmente, Aruba tin actualmente un Zona di Desperdicio permanente na Barcadera, cu ta brinda comunidad un opcion continuo pa entrega desperdicio.
Gobierno, empresa y comunidad hunto
Un parti importante di Cuida Aruba ta precisamente cooperacion entre diferente sector. Prome Minister Eman a expresa gradicimento na e partnernan cu ta contribui tanto operacional como financieramente pa haci e accion posible, muy specialmente na WEB Aruba NV.
El a destaca cu instancianan manera DOW, Serlimar y City Inspector lo bolbe mobilisa nan ekiponan durante e accion, complementando e trabou cu nan ta haci diariamente pa mantenimento y limpiesa di Aruba.
Na mes momento, otro instancia ta contribui riba tereno di organisacion, salubridad y siguridad. Eman a enfatisa cu, durante un accion di e magnitud aki, no solamente resultado ta importante, sino tambe cu tur participante por traha den un forma safe.
Cuida Aruba por ta mucho mas cu recoge sushi
Eman a invita comunidad pa mira e iniciativa den un sentido mas amplio. Si un bario ta limpi, por identifica otro necesidad caminda accion boluntario por haci diferencia.
Esaki por ta un cancha deportivo cu mester di mantenimiento, un scol cu por haya atencion, un club of facilidad comunitario cu mester di un man adicional, of simplemente un espacio den bario cu por mehora.
Segun e Prome Minister, Gobierno no semper tin e recurso financiero pa atende tur necesidad pareu. Precisamente aki iniciativa boluntario, creatividad y cooperacion di comunidad por agrega balor.
E vision ta pa e ultimo diasabra di luna gradualmente bira un momento caminda famianan, organisacionnan, empresanan y bario por haci e pregunta: kico nos por haci awe pa nos pais?
Cuida Aruba ta busca asina pa crea algo cu por keda mas leu cu e propio dia di accion: un cultura di participacion, cuido y responsabilidad comparti.
“Ban ta creativo y mira kico nos por haci pa yuda Aruba, no solamente cu limpiesa, sino tambe cu mantenimiento di aspectonan importante cu ta contribui na un miho calidad di bida pa nos comunidad,” Eman a conclui.
