Parlamentario Jennifer Arends-Reyes, kende durante añanan a sostene e proyecto di Formacion Social, conoci como Sociaal Vormingstraject (SVT), a participa na e ceremonia di entrega di certificado na un grupo di hobennan cu a completa nan trayecto exitosamente.
E ceremonia a tuma luga dia 26 di augustus na Scol di Arte na San Nicolas. Pa Arends-Reyes, tabata un momento special pa presencia e logro di e graduadonan, conoce e grupo nobo, tende nan experiencianan y mira e orguyo riba cara di e hobennan y nan famianan.
“SVT semper tabata un proyecto cu mi ta kere den dje, pasobra e ta duna hobennan structura, guia y un oportunidad nobo. No tur hoben ta sigui e mesun caminda, pero tur hoben merece un chens pa descubri su capacidadnan y traha riba un futuro mihor,” Arends-Reyes a expresa.
E programa ta combina formacion personal y disciplina cu preparacion pa sigui estudio of drenta mercado laboral. Di e manera aki, e hobennan ta desaroya no solamente habilidadnan practico, sino tambe responsabilidad, perseverancia, respet y confiansa den nan mes.
Segun Arends-Reyes, e grupo cu a ricibi nan certificado ta demostra loke por logra ora un hoben haya bon guia, sosten y un oportunidad concreto pa sigui dilanti.
“Tras di cada certificado tin esfuerzo, reto y sacrificio. E logro aki ta di e hobennan, pero tambe di nan famianan, e guiadornan y tur hende cu a sigui sostene nan durante henter e trayecto,” el a bisa.
E parlamentario ta considera esencial pa SVT sigui haya sosten structural y pa gobierno, enseñansa y sector priva sigui traha hunto. Despues di completa e programa, cada participante mester tin oportunidad pa sigui cu estudio, un stage of un puesto di trabou. Di e manera aki, e esfuerzo haci durante e trayecto por traduci den un futuro stabiel y productivo.
Finalmente, Arends-Reyes a felicita tur e participantenan pa nan logro y a gradici e ekipo di Formacion Social pa su dedicacion y compromiso cu futuro di nos hobennan.
“Mi ta sostene SVT for di principio y mi lo sigui haci esaki. Cada hoben cu haya un rumbo nobo ta un ganashi, no solamente pa su famia, sino pa henter Aruba,” Arends-Reyes a conclui.
