Algemene Rekenkamer Aruba (ARA) a logra un score di 73.77 punto den e evaluacion di IDIGI-ISA 2026, poniendo esaki na e nivel Bon di disponibilidad di informacion. E resultado aki ta marca un logro institucional importante, ya cu e ta representa e prome participacion di ARA den e indice regional aki despues cu Aruba a bira miembro di e Organisacion di Institucionnan Supremo di Auditoria di Latino America y Caribe (OLACEFS). E resultado ta establece un base cu lo permiti e instituto pa midi obhetivamente su progreso den transparencia, acceso na informacion y responsabilidad den e añanan venidero.
E Indice di Disponibilidad di Informacion riba Maneho Institucional pa Ciudadanonan di Institucionnan Supremo di Auditoria (IDIGI-ISA) ta un evaluacion independiente, obhetivo y tecnico cu ta evalua e disponibilidad di informacion publico for di e perspectiva di un ciudadano cu ta subi e website institucional di un Institucion Supremo di Auditoria (ISA) buscando informacion tocante di e organisacion, uzo di recurso publico, resultadonan di investigacion haci (audits) y responsabilidad. Su metodologia ta depende exclusivamente di informacion cu ta publicamente disponibel pa cualkier usuario durante e periodo di evaluacion, garantisando asina resultadonan comparabel, verificabel y institucionalmente imparcial.
E edicion di 2026 di IDIGI-ISA ta marca dies aña di implementacion continuo, consolidando su posicion como e referencia regional lider pa evalua transparencia proactivo y acceso di e ciudadanonan na informacion dentro di Institucionnan Supremo di Auditoria den henter Latino America y Caribe. E indice ta wordo promovi pa OLACEFS pa medio di su Comision Tecnico riba Practicanan di Bon Gobernacion (CTPBG), cu sosten tecnico di e organisacion di sociedad civil Corporación Acción Ciudadana Colombia (AC-Colombia).
E evaluacion ta destaca forsanan significante den e disponibilidad di informacion publico riba e website institucional di ARA. E instituto ARA a logra e puntuacion mas halto posibel den e categorianan di Cuadro Institucional y Actividadnan di Auditoria, mientras cu tambe a haya resultadonan fuerte den Structura di Organisacion y Responsabilidad Publico. E resultadonan aki ta demostra cu e instituto ARA ta provee ​​suficiente informacion tocante su organisacion, ehercicio di su mandato di auditoria, y su mecanismonan basico di responsabilidad, ofreciendo ciudadanonan recursonan valioso pa supervicion publico y fortalecemento di confiansa publico.
E evaluacion tambe a identifica oportunidadnan pa amplia e informacion publica tocante maneho y plannan di e instituto y e presupuesto di e instituto, particularmente a traves di publicacion di e plan di auditoria anual, e plan di accion di e instituto, obhetivonan di auditoria, informacion di presupuesto, y otro documentonan strategico cu lo permiti ciudadanonan haya un comprondemento mas profundo di e maneho y prioridadnan di e instituto. E recomendacionnan aki ta provee ​​un mapa pa fortalece progresivamente e transparencia proactivo di e instituto.
Como un innovacion metodologico, e IDIGI-SAI di 2026 a incorpora un evaluacion cualitativo di e experencia di nabegacion di usuario riba e websitenan institucional. Den e componente aki, e website di Algemene Rekenkamer Aruba a haya reconocemento pa su structura simpel, bon organisa y funcional, pa e nabegacion intuitivo y e uzo extenso di contenido publica directamente den formato web, ya cu tur esakinan ta facilita acceso publico na informacion. E evaluacion tambe a recomenda pa sigui fortalece accesibilidad digital di acuerdo cu e guianan di WCAG, mehora e visibilidad di e fechanan di publicacion y actualisacion, y complementa e rapportnan tecnico cu versionnan cu idioma simpel, resumennan ehecutivo y infografia pa haci nan mas accesibel pa publico no-specialisa.
Tambe e rapport ta señala cu Aruba su reciente afiliacion na OLACEFS ta crea oportunidadnan nobo pa intercambia experiencia y bon practicanan cu Algemene Rekenkamers den henter e region. Basa riba e prome evaluacion aki, ARA lo por desaroya un programa di mehoracion continuo dirigi na fortalece transparencia institucional, aumenta e disponibilidad di informacion publico y avansa progresivamente pa e nivel Optimal den evaluacionnan den futuro.
Algemene Rekenkamer Aruba, cu na november 2025 a bira miembro pleno di OLACEFS, ta sumamente contento y satisfecho cu e resultado di e prome evaluacion haci door di e un Instituto asina importante. For di e resultado di e evaluacion aki a resalta e partinan fuerte y tambe unda tin caminda pa mehoracion. ARA ta den un trayecto pa sigui mehora su website y lo haci bon uzo di e resultadonan di e evaluacion aki pa mehora e aspectonan di informacion na e publico cu ainda no ta optimal. E meta di e trayecto aki ta pa por duna informacion mas completo y cla na e publico.
ARA ta gradici e organisacion di sociedad civil Corporación Acción Ciudadana Colombia (AC-Colombia), cu ta sostene e Comision Tecnico riba Practicanan di Bon Gobernacion (CTPBG) di OLACEFS, pa nan profesionalismo y e tremendo trabao desplega cu e realisacion di e evaluacion aki. E cooperacion cu ARA a ricibi di AC-Colombia tabata hopi valioso y cu e informacion ricibi nos por sigui traha na mehora e informacion na e cuidadanonan di Aruba.
Resultadonan Clave
• Score 2026 IDIGI-ISA: 73.77 punto.
• Nivel Logra: Bon.
• Clasificacion Regional: 14.
• Prome participacion na IDIGI-ISA despues di afiliacion di Aruba na OLACEFS.
• Fortalesa clave: Cuadro Institucional, Actividadnan di Audit, Structura Organisacional y Responsabilidad Publico.
• Oportunidadnan principal pa mehoracion: Maneho y plannan institucional, presupuesto institucional y mas mehoracion di e accesibilidad di e website institucional y comunicacion orienta riba e ciudadano.
Tocante e IDIGI-ISA
E Indice di Disponibilidad di Informacion riba Maneho Institucional pa Ciudadanonan di e Institutonan Supremo di Auditoria (IDIGI-ISA) ta evalua den cua grado e Institucion Supremo di Auditoria ta pone disponibel pa e ciudadanonan informacion cla, completo, accesibel y util tocante nan organisacion, maneho di e instituto, uzo di recursonan publico, actividadnan di auditoria y responsabilidad.
E edicion di 2026 a marca e di seis evaluacion regional, cu participacion di 23 Institucion Supremo di Auditoria cu ta miembro di OLACEFS, consolidando dies aña di monitor continuo di transparencia institucional y acceso di e ciudadanonan na informacion den henter Latino America y Caribe.
Algemene Rekenkamer Aruba
