Minister di Finansa, Asunto Economico y Sector Primario mr. Geoffrey Wever ta informa cu Presupuesto 2027 a wordo entrega na Parlamento, na tempo manera stipula den ley. Banda di entrega e presupuesto na tempo, Presupuesto 2027 ta cumpli cu e normanan di presupuesto ancra den ley, ta mantene finansa publico den control y ta crea espacio pa sigui duna e beneficio di desaroyo economico bek na comunidad.
Presupuesto 2027 ta proyecta un surplus di Afl. 84,1 miyon pa Pais Aruba, equivalente na 1 porciento di Producto Interno Bruto. Na nivel di sector colectivo, ta proyecta un surplus di mas cu Afl. 203 miyon, equivalente na 2,4 porciento di Producto Interno Bruto. College Aruba financieel toezicht (CAft) a evalua e ontwerp-begroting 2027 positivamente y a conclui cu e presupuesto ta cumpli tanto na nivel di Pais como na nivel di sector colectivo cu e normanan financiero ancra den ley.
Prioridad di maneho di Gabinete AVP-FUTURO ta un finansa publico duradero segun normanan di presupuesto stipula den ley y duna e beneficio di e desaroyo economico bek na comunidad. Presupuesto 2027 tin como punto di salida ehecucion di Programa di Gobernacion 2025-2028 como fundeshi di e esfuerso colectivo na beneficio di desaroyo di tur hende.
E Presupuesto 2027 ta refleho di compromiso di Gabinete AVP-FUTURO pa sigui usa presupuesto di Pais Aruba como instrumento strategico di maneho pa desaroyo di Aruba. E maneho financiero ta enfoca riba mantene disciplina presupuestario, reduci gastonan structural, baha carga di interes, sigui reduci debe y crea espacio financiero pa inversionnan y prioridadnan cu ta contribui directamente na bienestar y poder di compra di comunidad.
E perspectivanan economico pa 2027 ta positivo. Departamento di Asunto Economico, Comercio y Industria ta proyecta un crecemento nominal di economia di 4,1 porciento pa 2027, cu Producto Interno Bruto proyecta na aproximadamente Afl. 8,4 mil miyon. Inversionnan ta proyecta como e motor principal di crecemento, mientras cu consumo priva, exportacion y actividad economico tambe ta sigui contribui na desaroyo di economia.
Un otro resultado importante di e maneho financiero ta e trayectoria di debe. Na nivel di sector colectivo, debe nacional ta proyecta pa baha di 59 porciento di Producto Interno Bruto na 2026 pa 54 porciento na 2027 y sigui baha den e añanan despues. Esaki ta importante pasobra menos debe y un maneho mas eficiente di refinanciamento ta crea mas espacio den futuro pa usa placa publico na beneficio di comunidad enbes di destina mas placa na pago di interes.
E Presupuesto 2027 ta continua tambe cu e principio di duna e beneficio di e desaroyo economico bek na comunidad. Den e presupuesto tin fondonan pa e compromiso di Gobierno relaciona cu pension y Reparatietoeslag, mientras cu maneho economico ta sigui enfoca riba mehoracion di poder di compra, stimula actividad empresarial y crea mas oportunidad economico.
Na mes momento, Gabinete AVP-FUTURO ta sigui traha riba un economia mas diversifica y menos dependiente di un solo sector. Presupuesto 2027 ta sostene e vision pa desaroya sector economico nobo y fortalece esnan existente, entre otro agricultura y Sector Primario, economia blauw, fintech, energia renovabel y industria creativo. Tambe ta inclui como prioridad e revitalisacion di Oranjestad y San Nicolas como centronan economico, stimula emprendemento, facilita inversion y mehora acceso na financiamento.
Aña 2027 ta marca tambe un siguiente paso den modernisacion di manera cu Gobierno ta prepara y controla presupuesto. Gabinete AVP-FUTURO ta introduci gradualmente un sistema di policy-based budgeting, caminda placa publico ta wordo conecta mas directamente cu prioridadnan di maneho y resultado cu Gobierno kier logra. E meta ta pa presupuesto no ta solamente un lista di entrada y gasto, pero un instrumento cu ta mustra unda placa publico ta bay, kico Gobierno kier logra cu e placa ey y cua resultado comunidad por spera. E proyecto policy-based budgeting ta un proyecto cu sosten financiero di Hulanda por medio di Landspakket. Minister Geoffrey Wever ta gradici Hulanda pa nan sosten den e proyecto importante aki.
Ademas, Gobierno ta sigui fortalece control riba riesgonan financiero, inversionnan publico y ehecucion di presupuesto. Cu introduccion di instrumento manera Fiscal Risk Assessment Tool y e preparacion di un agenda di inversion multianual relaciona cu Algemeen Investerings- en Ontwikkelingsfonds, Gobierno ta crea mas structura, transparencia y control riba uzo di fondonan publico.
Presupuesto 2027 ta mustra cu disciplina financiero y progreso economico por bai hunto. Mantene finansa publico den control no ta un meta riba su mes, pero e fundeshi pa por sigui inverti den hende, economia y futuro di Aruba. Un finansa publico sano ta crea e espacio pa Gobierno por proteha poder di compra, stimula inversion, fortalece economia y sigui duna e beneficio di crecemento bek na comunidad.
Cu entrega di Presupuesto 2027, Gabinete AVP-FUTURO ta cumpli un biaha mas cu e proceso legal, ta cumpli cu e normanan di presupuesto y ta sigui fortalece e fundeshi financiero di Pais Aruba. Minister Geoffrey Wever ta gradici e ministernan di Gabinete AVP-FUTURO, Departamento di Finansa y Departamento di Legislacion y Asunto Huridico pa e esfuerso colectivo y e trabao realisa pa prepara Presupuesto 2027 na beneficio di Pais Aruba.
