Si bo tende cu mal tempo ta na caminda, bo mester move, busca un lugar sigur pa bo drenta aden,
Si bo tende cu tin un adansa na caminda, bo ta busca remedi y bon vitamina pa mantene bo salud.
Si bo tende cu nos ta bibando den tempo trabahoso, bo mester cuida bo mes di trampa diabolico.
Si bo tende cu Cristo Hesus por bini manera ladron den anochi, bo mester prepara pa Su binida.
Si bo tende cu esun cu kere lo ta salba, bo mester kere pa bo ricibi salbacion.
Si bo tende cu cas di bo bisinja ta na candela, bo mester cuminsa tira awa riba esun di bo.
Si bo tende cu droga y alcohol ta destrui bida di hende, bo mester aparta for di e cos ey.
E mucha cu no ta tende di su mayornan , lo confronta problema.
Ora un hende no kier tende palabra di Dios, su crecemento lo ta limita.
Ora un hende no kier tende , e ta demostra di ta un persona caprichoso, y cu curason duro.
No solamente un hende mester tende, pero e tin cu move, pa maldad no alcansa su bida.
Zakeo a tende di Hesus y a subi den un palo pa mira Hesus.
Bartimeo a tende di Hesus y a cuminsa grita Su nomber pa e por hanja yudansa.
E muher cu fluho di sanger pa 12 anja a tende di Hesus y a move bay mishi cu Su bisti.
E baby den barica di Elisabeth a tende e Saludo di Maria y a bula den Elisabeth su barica.
E wardadornan a tende e anuncio di e angelnan y nan a bay busca Hesus cu a nace.
Cristo Hesus lo bini bek cu zonido di trompet, y hasta e mortonan lo tende y lanta.
Tin un gran bendicion ora hende ta tende y obedece e palabra di Dios.
Pasobra si bo no ta tende y obedece, lo bo no reconoce Su autoridad den bo bida.
Ora bo no kier tende Su palabra , bo no por ricibi e encargo cu E tin pa bo bida.
Pa motibo cu David no kier a tende y a sigi su propio pasion, e a ricibi consecuencia grave.
Ora conscientemente nos no kier tende , nos lo hanja nos den problema grandi.
Si un hende no kier tende,no stuur bao di influencia di alcohol, ni tiki, ni hopi,accidente lo sosode.
Si un hende no kier tende di no gasta mas cu e ta gana, lo e tin dolor di cabes constant.
Ora un hende no kier tende, e ta pone su salud mental na peliger, pasobra horea duro tambe ta causa di stress y depresion.
Bo no por confia un hende cu no ta tende den un posicion di liderasgo pasobra e ta pega barco.
Un hende cu no ta tende, ta perde bon amistad, pasobra e no ta respeta, y ta hinca otro den problema.
No ta importa ken bo ta. Tampoco bo posicion, cuanto scol bo tin, tampoco e edad cu bo tin semper, tende y scucha, especialmente ora e palabra di Dios, pa asina bo por tin bida largo.
No presta bo oido pa scucha maldad, no tende bagamunderia cu no ta hiba bo ningun caminda, pasobra mal influencia ta drenta via oido, y asina alcansa e mente, pa hinca henter un bida den scuiridad.
Tende, scucha, balora, respeta, pone atencion, anhela e palabra di Dios manera lechi di mama (1 Pedro 2:2) pa asina bo crece den boluntad di Dios.
Tende y haci, no drumi, bendicion ta bati na bo porta.
Sinceramente, Pastor Marcel Balootje.
