Durante su bishita na Corsou relaciona cu e Justitieel Vierlandenoverleg, Minister di Husticia, Integracion, Transporte Publico y Energia, mr. drs. Arthur Dowers, a tene un reunion cu Giuseppe Mancinelli, Deputy Regional Director for Latin America and the Caribbean di United Nations Office for Project Services (UNOPS), relaciona cu e proyecto di un prizon nobo na Aruba.
Ta pa algun tempo caba cu reunionnan ta tuma luga entre Minister Dowers y ehecutivonan di UNOPS pa mira e posibilidadnan pa cooperacion den e desaroyo di un instituto coreccional nobo pa Aruba.
Na comienso di 2026, durante su bishita na Sint Maarten, Minister Dowers a reuni cu ehecutivonan di UNOPS. Durante e reunion aki a dialoga riba e experencia di UNOPS den duna asistencia tecnico, maneho di proyecto y supervision financiero di proyectonan publico.
E contacto cu UNOPS a surgi tambe mirando e experencia cu e organisacion tin na Sint Maarten, unda UNOPS ta duna asistencia den e desaroyo di e institucion coreccional nobo na Point Blanche. E proyecto ta inclui asistencia tecnico pa e diseño y supervision di e implementacion di e infrastructura, cu atencion pa resiliencia, siguridad y condicionnan digno pa detenidonan.
Pa Aruba, e experencia di UNOPS cu e proyecto na Sint Maarten ta relevante den e proceso pa mira e posibilidad pa un prizon nobo. E situacion actual di KIA ta haci cu e desaroyo di un institucion coreccional moderno ya no ta opcion sino un necesidad y tin atencion di e mandatario di husticia.
E reunion na Corsou ta forma parti di e contacto continuo entre Aruba y UNOPS, unda ta sigui explora e posibilidadnan pa cooperacion y asistencia tecnico pa e proyecto di prizon nobo pa Aruba.
