Na ocasion di apertura oficial di e aña parlamentario nobo, Parlamentario di AVP, Ing. Carlos Bermudez, ta haci un evaluacion di su trabou durante e periodo pasa y ta reafirma su compromiso pa sigui transforma e preocupacionnan di pueblo den pregunta oficial, mocion y solucion concreto.
Durante e periodo parlamentario anterior, Bermudez a mantene contacto directo cu ciudadanonan, trahadornan, taxistanan, vergunninghouders, empresarionan y residentenan di diferente bario.
E preocupacionnan comparti cu ne a wordo traduci den accion parlamentario y acercamento cu e ministernan y instancianan concerni.
Un di e temanan cu a haya mas atencion ta transporte. Bermudez a insisti riba actualisacion di tarifanan di taxi, mas transparencia pa pasahero y proteccion di e taxistanan cu ta cumpli cu ley. Publicacion di e lista di prijs nobo y introduccion di Taxi.aw ta pasonan positivo, despues di ocho aña sin actualisacion, pero, segun e parlamentario, e trabou no ta cla ainda.
E problematica di taxi y operator pirata lo ta un di su prioridadnan principal den e aña parlamentario nobo.
Actividad ilegal ta crea competencia inhusto, pone siguridad di pasahero na riesgo y ta perhudica esnan cu a inverti den un vergunning y ta cumpli cu tur condicion legal.
Bermudez a propone pa considera un Task Force interinstitucional cu participacion di Departamento di Transporte Publico, Korps Politie Aruba y otro instancia concerni, pa fortalece control, aplicacion di ley y accion contra abuso.
Vergunninghouders di transporte turistico, tour operators y autobus tambe lo haya nan debido atencion, specialmente awor cu implementacion di innovacion y sistemanan nobo a cuminsa.
“Modernisacion ta necesario, pero e mester bay man den man cu informacion, dialogo, control y respet pa e personanan cu ta depende di e sector pa gana nan pan,” Bermudez a expresa.
Servicio di taxi na aeropuerto tambe lo forma parti di su agenda. E parlamentario kier evalua, hunto cu taxistanan, Gobierno y Aruba Airport Authority, con por mehora organizacion, facilidadnan, informacion pa pasahero y condicionnan di trabou.
“Nos mester yuda nos taxistanan pa nan por yuda Aruba ainda mas. Nan ta entre e prome personanan cu nos bishitantenan ta encontra y nan servicio ta forma parti di e impresion cu turista ta hiba bek cas,” el a declara.
Otro tema central durante e periodo anterior tabata dignidad y proteccion di trahadornan. Despues di ricibi decenas di señal tocante intimidacion, trato desigual, abuso di poder, pago incorecto, falta di oportunidad pa promocion y posible malcumplimento di leynan laboral den sector hotelero, Bermudez a solicita un plan urgente di inspeccion.
E plan lo keda un punto principal den e aña parlamentario nobo, cu enfoke riba control efectivo na pia di trabou, cumplimento cu leynan laboral, proteccion contra abuso y un canal anonimo pa empleado por reporta situacion sin miedo pa represaya.
Segun Bermudez, despues di su implementacion y evaluacion den hoteleria, e plan mester evoluciona pa un sistema di inspeccion aplica na tur sector laboral di Aruba.
“Tur sector ta importante pa nos economia, pero progreso no por bay na costo di dignidad humano. Un empleado cu ta respeta y balora lo contribui mas na su empresa y na Aruba,” el a enfatisa.
Infrastructura y calidad di bida den bario a forma otro parti importante di su trabou. Bermudez a solicita un plan multianual cu DOW pa inventarisa peticionnan pendiente pa asfalt, sleeping police, limpiesa y snoei, y informa comunidad ki tempo nan por spera accion.
Pa e parlamentario, asfalt no ta un luho, ya cu stof, lodo y camindanan den mal estado tin impacto directo riba salud, siguridad y condicion di vehiculo. Pueblo por compronde cu no por atende tur peticion pareu, pero mester tin un plan cla, prioridad y comunicacion honesto.
Ademas, el a presenta un mocion, aproba unanimamente, pa inicia estudio pa transforma e crusada di Palm Beach–Caya Nelson Florencio Sprok den un rotonde moderno y sigur.
Tambe el a presenta pregunta oficial tocante e estado deplorabel di e caminda entre rotonde di Super Food y Palm Beach.
Un otro caso cu a haya su atencion ta e brug di Rooi Afo, cu ta cera desde februari 2025 y ta causa inconveniencia pa residentenan, automobilistanan y negoshinan den e area. Bermudez a acerca Minister di Infrastructura y DOW, y a presenta un mocion pa pidi atencion urgente, alocacion di fondo y seguimiento di e projectdossier necesario pa logra reapertura di e brug.
“Un aña parlamentario nobo no ta nifica cu nos ta cuminsa for di cero. E ta nifica cu nos mester sigui unda nos a keda, acerca e ministernan concerni, exigi contesta y verifica cu plan y promesa ta bira accion,” Bermudez a enfatisa.
Den e periodo nobo, Ing. Carlos Bermudez lo sigui duna seguimiento na tur e puntonan presenta, cu enfasis special riba taxi y operator pirata, vergunninghouders, innovacion den transporte, servicio di taxi na aeropuerto, inspeccion laboral, infrastructura den bario y reapertura di brug di Rooi Afo.
Den un segundo comunicado, Parlamentario Bermudez lo amplia riba otro temanan cu a forma parti di su trabou, incluyendo acceso liber na beach y palapanan, proteccion di naturaleza, sector di piscamento, diversificacion economico, salud y preparacion di Aruba pa futuro.
