E situacion cu e sector di tour operators local ta enfrentando a yega na un punto critico. Recientemente Fraccion di MEP a reuni cu un representacion di e sector aki. Despues di e reunion importante aki, a keda demostra e falta di dialogo di parti di gobierno y e impacto di e decision unilateral cu a keda tuma. E situacion aki ta conduciendo cu alrededor di 1000 mama y tata di famia Arubano ta den e riesgo real pa perde nan trabou y pan di cada dia. Alabes Fraccion di MEP a keda informa cu e decision tuma unilateralmente aki ta poniendo na riesgo real cu companianan local cu pa añanan a inverti y ta opera na un manera legal mester cera nan porta.
Pro regulacion, pero cu dialogo
E operadornan di tour legal a expresa claramente cu nan no ta contra regulacion. Al contrario, nan ta totalmente pro pa crea un balans husto entre proteccion di nos medio ambiente y continuidad di e sector turistico. Nan ta dispuesto pa sigui reglanan fiho, uza rutanan structura via GPS, y haci e ahustenan necesario pa proteha nos naturalesa. Sin embargo, pa logra esaki mester tin un dialogo berdadero y no decisionnan tuma di un dia pa otro cu ta paralisa e sector.
Lastimamente, Prome Minister Mike Eman no ta duna oido na nan peticion pa un reunion, apesar cu segun informacion di e sector, e decision aki a keda tuma pa su persona. Ademas, e operadornan di tour ta sperando ainda riba e reunion cu Minister Cicilia a priminti di yama cu tur e ministernan relevante pa habri e dialogo y yega na un miho solucion, pero te cu awe e encuentro aki no a tuma luga. Por ultimo, e reunion cu Minister Dowers tampoco no a conduci na nada concreto, como cu e no tabata na altura di e decision tuma y awor kier warda e resultado di e caso hudicial cu Aruba BirdLife Conservation a lanta contra Fundacion Parke Nacional Arikok y Pais Aruba.
Prome Minister Eman ta e prome yama pa sinta na mesa
Mirando cu e decision aki a keda tuma unilateralmente bou di maneho di Prome Minister Mike Eman, cual a crea e impasse aki, su persona mester asumi e responsabilidad y sinta mesora na mesa cu e operadornan di tour. No por sigui laga e sector den incertidumbre completo ni sigui manda nan di un porta pa otro, mientras cu e siguridad financiero di tanto famia ta na peliger y companianan den riesgo di mester cera nan portanan. Ambos riesgo sigur lo tin consecuencianan directo pa economia di nos pais.
Peticion pa reunion publico di Parlamento
Considerando e gravedad y e urgencia di e asunto aki, nos a manda un peticion oficial pa un reunion Publico den Parlamento di Aruba pa trata e situacion delicado aki debidamente y busca solucionnan concreto.
Mi ta haci un apelacion directo na Presidente di Parlamento pa e yama e reunion publico aki cu caracter di urgencia lo mas pronto posibel. Parlamento, como e organo cu ta representa e pueblo, mester tuma e liderazgo pa exigi atencion pa e situacion aki, urgi gobierno pa duna e crisis aki su debido atencion. Habri dialogo, duna cara y traha pa yega na un miho solucion.
Dialogo, balans y accion mester tuma luga awo!
