Aruba ta enfrenta crisis tras di crisis, y e contesta di e Gobierno ta silencio. Esaki ta e conclusion di lider di oposicion y parlamentario Evelyn Wever-Croes durante e debate publico dialuna ultimo.
“Nos ta mira crisis den naturalesa y medio ambiente, economia y diversificacion, turismo, husticia, enseñansa, salubridad y infrastructura. Pero na e momento cu Aruba mester di liderasgo, Gobierno ta keda keto.” Segun Wever-Croes, e problema ta mas profundo cu solamente falta di accion. “Pueblo ta mira e problema. Parlamento ta mira e problema. Pero Gobierno no ta actua. Esaki no ta liderasgo. Esaki ta falta di responsabilidad.”
GOBIERNO NO TA RESPETA PARLAMENTO
Wever-Croes a señala tambe cu Parlamento a aproba dos mocion unanime pa pidi Gobierno explora posibilidadnan den industria petrolero. “Ora un Parlamento completo ta uni su mes riba un tema y Gobierno simplemente no ta haci caso, e ta mustra cu no tin solamente un problema di accion, pero tambe un problema di respet pa e Parlamento.” E parlamentario ta critica tambe e falta di iniciativa pa enfrenta e diferente crisisnan di Aruba.
“Nos no por normalisa un gobierno cu ta keda keto mientras problema ta bira mas grandi. Aruba no por permiti cu falta di liderasgo bira e normal nobo.”
ARUBA MERECE MIHO
Wever-Croes ta bisa cu e momento a yega pa cambia e manera di goberna. “Aruba merece un gobierno cu ta duna direccion, cu ta scucha, cu ta tuma responsabilidad y cu ta entrega resultado. Nos merece mas cu silencio.” E lider di oposicion a termina cu un mensahe di speransa y accion: “Nos no ta acepta cu crisis y silencio ta nos futuro. Nos por haci otro. Nos mester haci miho. Y cu vision, curashi y accion, nos por construi un Aruba mas fuerte”.
