Durante su mision economico na Santo Domingo den cuadro di HUB Camara Santo Domingo 2026, Minister di Finansa, Asuntonan Economico y Sector Primario, Geoffrey Wever, a sostene reunionnan strategico cu dos autoridad importante di Republica Dominicana pa explora con conectividad aereo y maritimo entre ambos pais por wordo fortalece.
Minister Wever a reuni cu Dra. Bernarda Franco Candelario, Secretaria de la Junta de Aviacion Civil (JAC), y cu Sr. Alejandro Campos Alvarez, Director Ehecutivo di Autoridad Portuaria Dominicana (APORDOM). E dos encuentronan tabata enfoca riba un solo meta, pa crea un infrastructura logistico mas eficiente, confiabel y competitivo cu por sostene un relacion comercial mas fuerte entre Aruba y Republica Dominicana.
Pa Minister Wever, si Aruba kier amplia su mercado y diversifica su fuentenan di abastecemento, no ta suficiente pa solamente identifica proveedor nobo. E conexionnan necesario pa move producto, carga y persona mester ta igualmente fuerte.
“Nos por identifica oportunidad comercial y proveedor nobo, pero si nos no tin e conectividad pa move producto di forma eficiente, e oportunidad no ta bira un resultado concreto. Pa e motibo ey nos ta traha riba henter e cadena di mercado, proveedor, transporte, capacidad, regulacion y coordinacion,” Minister Wever a indica.
Durante e reunion cu Presidente di JAC, Sr. Julio Peña Guzman, e conversacion a concentra riba conectividad aereo entre Aruba y Republica Dominicana y e importancia cu esaki tin pa comercio, turismo, mobilidad empresarial y carga aereo.
A discuti riba frecuencia y capacidad di conexionnan actual y riba e posibilidad pa, den futuro, explora mas capacidad, frecuencia of otro alternativa, dependiendo di condicionnan regulatorio, bilateral y comercial.
Un punto importante tabata e uso di capacidad di carga disponibel den vuelonan di pasahero. Pa producto sensibel pa tempo y cierto producto di balor halto, carga aereo por representa un opcion importante. Esaki ta relevante tambe pa cierto producto alimenticio, incluyendo carni di baca, especialmente ora velocidad y confiabilidad ta esencial.
E reunion cu JAC a pone tambe enfasis riba necesidad pa fortalece cooperacion y intercambio di informacion tecnico entre autoridadnan di aviacion, aerolineanan y autoridadnan relevante na Aruba.
Despues, durante su reunion cu Director Ehecutivo di APORDOM, Sr. Alejandro Campos Alvarez, Minister Wever a trata conectividad maritimo y e condicionnan necesario pa Republica Dominicana por desaroya su mes como un socio mas structural di abastecemento pa Aruba.
Na e momento aki, e conexion maritimo cu Aruba ta wordo sostene pa Don Andres, cu ta bishita Aruba un biaha pa siman via Corsou. E frecuencia limita, costo di transporte relativamente halto, tempo di entrega y volumen chikito di mercado Arubano ta algun di e retonan cu ta afecta competitividad di e ruta.
Durante e reunion, a duna atencion special na consolidacion di cargo y disponibilidad di suficiente capacidad refrigera, pa producto alimenticio, agricola y di carni..
E posibilidad pa posiciona Aruba mihor den un cadena di distribucion mas amplio den Caribe a forma parti tambe di e conversacion. Door di combina volumen regional y optimisa ruta existente, por crea mas eficiencia, mehora uso di capacidad y, unda ta posibel, contribui na costo logistico mas competitivo.
“Pa nos, conectividad no ta un tema tecnico separa for di economia. Conectividad ta economia. Si nos kier mas comercio, mas competencia y mas opcion pa sector priva, nos mester crea e ruta pa e comercio ey por desaroya,” Minister Wever a enfatisa.
E dos reunionnan ta conecta directamente cu e enfokee mas amplio di e mision na Santo Domingo, caminda Minister Wever ta traha pa habri oportunidad pa importa carni y otro productonan for di Republica Dominicana.
Mientras reunionnan comercial ta enfoca riba proveedor, volumen y viabilidad economico, e dialogo cu JAC y APORDOM ta trata e infrastructura logistico cu mester sostene e fluho comercial. Esaki ta inclui transporte aereo y maritimo, capacidad, frecuencia, carga refrigera, consolidacion y coordinacion entre diferente autoridad y compania.
E reunionnan a sirbi pa identifica oportunidadnan, reconoce e retonan y crea un base pa e autoridadnan relevante sigui explora e posibilidadnan tecnico y comercial.
Pa Minister Wever, e meta ta pa Aruba move for di dependencia riba un cantidad limita di ruta y mercado pa un modelo mas diversifica y resiliente.
“Nos ta traha pa Aruba tin mas opcion. Mas proveedor, mas conexion y mas ruta ta significa mas capacidad pa nos economia adapta y responde. Un economia fuerte no ta depende solamente di bon cifra financiero; e ta depende di e infrastructura, mercado y conexionnan cu ta sostene actividad economico cada dia,” minister Wevar a finalisa.
Ministerio di Finansa, Asuntonan Economico y Sector Primario lo sigui e dialogo cu e diferente actor y autoridadnan involucra, cu e meta di fortalece conectividad comercial y logistico entre Aruba y Republica Dominicana y crea e condicionnan pa un relacion economico mas fuerte y sostenibel entre ambos pais.
