Dios a institui matrimonio, no ta un punto di discucion, pero ta algo di admira y respeta den henter comunidad.
Dios a institui matrimonio pa multiplicacion di rasa humano.
Dios a institui matrimonio pa proteccion di nos muchanan ( Yiunan),
Dios a institui matrimonio pa perfeccion di karakter.
Dios a institui matrimonio pa construccion di sociedad.
Dios a institui matrimonio pa e ta algo permanente.
Den tur sociedad matrimonio mester wordo respeta, pasobra esey ta un pilar di sociedad cu mester wordo cuida, pa asina nos tin famia fuerte, yiunan bon educa, mayor responsabel y mas cu tur cos un moralidad halto.
For di den Genesis 2;24 nos por sinja hopi, aunke e no ta hopi largo como versiculo, pero su contenido tin hopi balor , mescos cu un pildora di vitamina pa boost inmunesysteem, asina e versiculo aki ta.
E ta contene unidad, respet, sinceridad,palabracion, amor,y un fuente di fortalesa pa den tur circumstancia e pareha por corda cu ta unu nan ta.
Ta para scirbi den Mateo 19:4-6 : E a contesta y a bisa, Boso no a lesa cu Esun cu a crea hende for di principio, a traha nan homber y muher, y a bisa. Pa e motibo aki un homber lo bandona su tata y su mama y lo uni cu su esposa, y nan dos lo bira un. Asina anto nan no ta dos, mas sino un carni. Pesey loke Dios a uni no laga ningun hende separa.
Den Filipensenan 2:2-3 e palabra di Dios ta bisa; Haci mi goso completo door keda di acuerdo cu otro, manteniendo e mesun amor, uni den spirito teniendo un solo proposito.
No haci nada cu actitud di egoismo of orguyo, ma cu humildad laga cada un di boso considera e otro mas importante cu e mes.
Esey ta hopi dushi den un matrimonio ora cada un ta wak pa otro pasobra nan ta uno, pasobra esey ta mandato di Dios.
No solamente den relacion sexual of intimidad.
Ora un ta malo e otro ta cuida.
Ora un ta pasando den un prueba e otro ta sostene.
Ora un tin un nesecidad financiero e otro ta yuda.
Pasobra nan ta uno, pasobra nan no por fia otro placa, pasobra un hende no por fia placa na su mes.
Ta masha mahos ora un pareha casa ta pleita pasobra un debe otro.
Riba tur cos unidad mester prevalece pasobra unidad ta nifica forsa.
Unidad den famia den Salmo 133, Salmo 128.
Unidad den oracion Mateo 18:19.
Unidad pa un bon acuerdo. Amos 3:3.
Mester tin unidad y sinceridad den matrimonio, pa asina yuinan bon educa wordo lanta, cu bon karakter, homber y muher integro.
Pa falta di unidad den matrimonio mucha hopi biaha no ta respeta, pasobra e no ta mira seriedad ora di coreccion y disiplina.
Efesionan 5:21-33 ta remarca con esposa y esposo mester trata otro y stima otro.
E muher mester somete na e homber y e homber mester stima su esposa. Asina cu locual cu Dios a estableci no ta wordo respeta tin consecuencia pa tur dos banda.
Matrimonio ta conecta e homber cu e muher den tur sentido di palabra.
Rabia ma no haci pica, no laga solo baha riba boso rabia.
Nunca laga un situacion of tercera persona tin dominio den boso bida, y laga e persona ey ta causa cu boso ta discuti cu otro, pasobra enemigo ta sabi y e ta wak debilidad di hende pa e causa problema, e por usa mama, tata, yiu, pa asina causa discucion, please no ignora su trampa.
Mantene union y sinceridad tur momento.
Sinceramente, Pastor Marcel Balootje
