Ta para scirbi den Jeremias 17:9 bisando: E curason ta enganjoso cu tur cos, y ta totalmente corupto, ken por comprende?
Lucas 6:45 ta bisa: E bon hende for di e bon tesoro di su curason, ta saca loke ta bon, y e mal hende for di e mal tesoro, ta saca loke ta malo, pasobra for di abundancia di curason su boca ta papia.
Den Mateo 12:34 Hesus ta bisa: Ami ta bisa boso , cu hende lo duna cuenta riba e dia di huicio di cada palabra bano cu nan papia.Pasobra segun bo palabranan lo bo wordo hustifica, y segun bo palabranan lo bo wordo condena.
Ora un hende bin trece un redo pa bo, cu otro persona ta papia malo di bo, no kibra bo cabes, pero sali cumpra un sacu di habon di por lo menos 25 liber pa dune pa laba su boca y no carga mal noticia den su boca, pero trece bon noticia, pasobra tene cuenta cu redo no tin entrada dilanti di Dios, y Dios ta odia un lenga mentiroso.
Pasobra pa un hende papia malo esey ta nifica cu maldad a yena su curason, y ta saliendo for di su boca, pa un hende persigi otro cu calumnia y malisia, esey ta nifica cu su plan ta pa kibra e otro persona, e no tin ningun idea pa edifica e persona.
Hende ta kere cu ora nan kibra otro hende, nan ta halsa nan mes , nan ta bira grandi, nan ta hanja fama, pero cada biaha cu un persona papia malo di un otro tras di su lomba, ta un senjal di cobardia y di un curason venena.
Anto Dios ta manda nos stima nos prohimo manera nos mes, esey ta nifica cu ningun hende no ta papia malo di nan mes, awor pakico bo ta ranca pluma di bo ruman y tira nan riba caya, pa kico papia un cos cu no ta berdad, y bo sa cu bo ta haci danjo, wak bon kico e palabra di Dios ta bisa den Efesionan 4:29.
Falsedad no ta bini di Dios e ta bini di diabel, pesey diabel ta , caminda e ta awe, e ta nos enemigo, e ta bin solamente pa horta , pa mata y pa destrui,e ta tata di mentira, den dje no tin misericordia tampoco pordon, pesey nos mester imita Cristo Hesus,pasobra den Cristo Hesus nos tin bida y bida na abundancia,bida eterna.
Warda bo curason riba tur cos,pasobra e ta e fuente di bida.( Proverbionan 4:23).
No cana sera compromiso cu ken cu ta, wak bon kico bo ta palabra, pa bo no cay den trampa, no ta tur hende cu ta papia dushi y bunita tin bon pensamento, corda cu wolf por bisti cuero di carne.
Especialmente nos hobennan,
Warda bo curason,
Cuida bo emocion,
No sea mucho lihe pa entrega bo mes na un persona, pa demostra stimacion barata, warda riba Senjor, Cuida bo mes,
Bisti decente,
Evita palabranan vulgar,
Evita violencia,
Controla bo comportacion,
Huy for di pasion baho,
No cumpra malesa pa bo curpa,
Tene bo mes puro den tur sentido.
Esun cu ta stima Senjor ta warda su palabra den nan curason, y asina demostra cu e ta un disipulo di Senjor , esun cu ta papia malo di su ruman no stima Dios, pasobra Dios ta amor, y amor di berdad,
Dios no tin acepcion di persona,serca Dios nos tur ta igual.
Y e pas di Dios cu ta surpasa tur comprendemento,lo warda boso curason y boso mente den Cristo Hesus.
Pone bo curason den man di Dios.
Sinceramente, Pastor Marcel Balootje
