E palabra di Dios ta bisa nos den Romanonan 12;1-2 : Pesey mi ta roga boso, rumannan pa medio di misericordianan di Dios, pa presenta boso curpanan como sacrificio bibo y santo, aceptabel pa Dios, cual ta boso sirbishi spiritual di adoracion. No sea conforme e mundo aki, ma sea transforma pa medio di e renobamento di boso mente , pa boso por comproba kico ta e bon y agradabel y perfecto boluntad di Dios.
Dios ta bolbe papia cu nos den 1 Corintionan 6:19 bisando : Of boso no sa, cu boso curpa ta e tempel di Spirito Santo . Kende ta den boso, Kende boso tin di Dios, y cu boso no ta pertenece na boso mes. Pasobra boso a wordo cumpra pa un preis, glorifica Dios den boso curpa.
Tambe e palabra di Dios ta recorda nos den 1 Corintionan 3;16-17 bisando: Boso no sa cu boso ta tempel di Dios y cu e Spirito di Dios ta biba den boso. Si un hende destrui e tempel di Dios, Dios lo destrui e. Pasobra e tempel di Dios ta santo, y esey ta loke boso ta.
Na prome lugar nos mester stima Dios riba tur cos y nos prohimo manera nos mes, nos mester presenta nos oracion y nos alabansa na Dios constantemente, nos no mester laga e cosnan di mundo aki tin dominio riba nos ni den palabra tampoco den hecho, nos mester somete nos mes na Dios, resisti e diabel, y e lo huy for di nos, pasobra e diabel ta bini cu pensamentonan contrali y oferta nan di mundo pa trata di danja locual Dios a haci limpi.
Si no tabata asina Dios lo no a spierta nos pa medio di su palabra , cu apostel Pablo ta scirbi pa nos,y nos tur sa cu awor mas cu nunca cu e binida di Cristo Hesus ta serca , nos relacion cu Dios mester ta mas fiel y mas ferviente, pa nos por ta cla ora e momento yega.
Tin hopi infiltracion mundano ta disfrasa den cosnan bunita,pa asina purba di reemplasa nos adoracion y nos tempo pa Dios.
Bo sa cuanto hende a keda pega den nan telefon y cu lesamento di bijbel a bira algo cu no ta tuma lugar tur dia mas, cuanto hende nan tempo pa haci oracion a cay atras, pasobra e telefon a secuestra nan mente, cu ta den dje nan ta henter dia.
No ta pornada ta para scirbi den Mateo 26:41: Keda vigila y haci oracion,pa boso no cay den tentacion, e spirito ta boluntario, ma e carni ta debil.
Hopi biaha nos ta lesa y nos ta tende locual ta wordo predica, pero nos no tene cuenta ora e palabra di Dios ta bisa:Sea sobrio, sea alerta , boso adversario e diabel, ta cana rond manera leon cu ta grunja, buscando ken e por devora.
No pensa cu ta un leon ta sali bula riba bo, pero influencianan diabolico y mundano ta bay rond tur caminda, hende kier permiti cosnan den nan bida, pensando cu nan ta bay cu moda, pero nan no ta wak kico ta tras di e cosnan ey.
Y eyden e peliger ta sinta pasobra e enemigo ta campeon den disfras, y ora hende ripara ta laat.
Por ehempel cuanto mayor sa cu influencia di weganan den tablet y den telefon ta cambia comportacion di nan yiu y hasta ta pone e mucha papia palabra malo na ingles, pasobra hasta den esey e enemigo a drenta.
Laga nos stima Dios, Cuida nos curpa, Stima nos famia, y dedica tempo na Senjor.
Sinceramente, Pastor Marcel Balootje
