Minister Gerlien Croes: Ministerio di Educacion ta ofrece diferente workshops y conferencia via e plataforma Learning Cities den September y October

Cu e meta pa sigui inverti den desaroyo profesional di nos educadornan y mehora e calidad di educacion na Aruba, Ministerio di Educacion, den colaboracion cu e iniciativa Learning Cities, ta anuncia diferente actividad den e siguiente periodo. E plataforma di learning cities lansa recientemente lo tin diferente curso riba e area di conscious discipline, un sesion tocante aliniacion entre formacion profesional cu mercado laboral, y tambe un conferencia tocante entrenamento di apoyo pa TOS (Trastorno di Desaroyo di Idioma). 

Conscious Discipline: Tayer Interactivo
E tayer aki lo tin un enfoke central riba e adulto pa cu educacion socio-emocional. Esakinan lo tuma luga riba dia 17 y 23 di september y lo wordo facilita door di Departamento di Enseñansa Aruba & Fundacion Educador Consciente Aruba. Durante e sesionnan aki, e educadornan y mayornan lo wordo ekipa cu strategianan practico pa prome maneha bo mesun emocionnan y asina guia e muchanan miho den nan desaroyo socio-emocional. E sesion di dia 17 ta pa educador y e sesion di dia 23 ta pa mayor, e sesionan aki ta completamente gratis. Por registra via e plataforma www.learningcitiesaruba.org

Aliniacion entre programanan di formacion profesional cu demandanan di mercado laboral local y pasantia
E sesion aki lo tuma luga riba dia 5 di october. Durante e sesion aki, lo discuti y intercambia idea riba con pa conecta enseñansa mas miho cu e necesidadnan di nos merca di trabou y habri porta pa e studiantenan pa medio di pasantia. E sesion aki ta enfoca pa crea mas colaboracion y aliniacion entre e institutonan cu ta ofrece formacion profesional, esta SPO, EPI, EPB, OABA.

Entrenamento di Apoyo pa TOS (Trastorno di Desaroyo di Idioma)
Dia 5 di october lo tin un conferencia di desaroyo profesional pa educadornan pa identifica y apoya studiantenan cu trastorno di desaroyo di idioma. Dia 6 di October lo tin e Congreso Nacional di Trastorno di Desaroyo di Idioma habri pa publico. E evento aki lo brinda mas informacion, profundisa bo conocemento y ofrece hermentnan practico pa uza. E conferencia aki ta wordo organisa door di Foundation for the Hearing Impaired Aruba (FEPOH). Nos ta invita tur educador pa participa dia 5 y henter comunidad pa participa dia 6 di october. Bin intercambia experiencia cu otro profesionalnan di enseñansa y den comunidad. E conferencia aki ta completamente gratis y por registra via e plataforma www.learningcitiesaruba.org.

Conferencia y tayer tocante didactica di Enseñansa Multilingual. Dia 19 di October lo tin un conferencia pa maestro di scol preparatiorio, klas 1,2 y 3 riba enseñansa di idioma den un contexto multilingual. Riba e dianan 20 pa 22 di October lo tin diferente tayer pa haci e transferencia di e teoria den practica. E siman di profesionalisacion aki lo brinda y profundisa bo conocemento y lo ofrece strategianan di siñamento pa enseñansa multilingual. E siman di conferencia y training aki lo ta na encargo di Centro pa Desaroyo Profesional Continuo di IPA  y lo tin como orador y guia prof. dr. Joana Duarte di universidad di Groningen, cu ta un experto riba inclusion y enseñansa multilingual. Nos ta invita tur maestro di principalmente pa participa na e training y conferencia aki. E conferencia y e tayernan ta completamente gratis y por registra via e plataforma www.learningcitiesaruba.org.

E actividadnan aki ta un oportunidad unico pa educadornan, mayornan y henter e comunidad di Aruba sigui crece y fortalece nos enseñansa hunto. Inverti den nos conocemento ta e miho manera pa garantisa e exito y bienestar di nos muchanan. No perde e oportunidad valioso aki! Bisita www.learningcitiesaruba.org awe mes, registra gratis y sea parti di e iniciativa pa eleva e calidad di educacion na nos pais. Hunto nos ta haci e diferencia.