Parlamentario Otami S.S. Thomasia ta President di e Comision Special di Caribe, un comision nobo crea pa pone necesidadnan y realidad specifico di Caribe mas central den agenda regional.
Pa Thomasia, e posicion aki tin un nificacion special tambe. Como un hende muhe di Aruba, lidera un comision regional ta un oportunidad pa representa Aruba, pero tambe pa mustra cu nos isla, aunke chikito, por contribui activamente na direccion y solucionnan pa Caribe.
Durante reunion di 10 y 11 september na Santo Domingo, e comision a concentra riba varios reto concreto: cambio climatico, crisis di sargazo, erosion y proteccion di costa, siguridad alimentario, comercio regional, financiamento berde y integracion regional.
Pero e reunion no a keda solamente na discusion. Riba cambio climatico, e Carta Parlamentario pa Accion Climatico ta avanzando den proceso di PARLATINO pa consideracion final na asamblea di december.
Riba sargazo, a discuti pa gar’e den lama prome cu e yega costa y posibilidad pa transform’e den biogas, bioplastico y biofertilizante. E comision a acorda tambe pa busca cooperacion cu organismonan financiero manera CAF, BID, Banco Mundial y Fondo Berde pa Clima, pa yuda hiba solucionnan di nivel piloto pa implementacion mas grandi.
Riba proteccion di costa, e comision a analisa experiencia di Cuba cu restauracion di mangel, coral y duna, proteccion di playa y adaptacion di comunidadnan costero. Un di e resultadonan ta e propuesta pa crea un mecanismo pa comparti bon practicanan entre paisnan di Caribe.
Siguridad alimentario tambe a haya atencion fuerte. A papia di produccion local, agricultura, pesca y acuicultura, pero tambe di como paisnan di Caribe por complementa otro. Un resultado concreto ta e propuesta pa avanza cu un acuerdo marco parlamentario pa facilita comercio agroalimentario, simplifica tramitenan, harmonisa certificadonan fitosanitario y crea canalnan directo entre productornan.
Ademas, e comision a acorda pa hiba un posicion regional comun na Tercer Cumbre Parlamentario Mundial contra Hambre y Malnutricion na Nairobi na november, cu compromiso riba agricultura resiliente, compra publico local y comercio agroalimentario regional.
Pa Thomasia, aki ta exactamente unda valor di e comision nobo mester keda: “Nos no mester solamente identifica problema. Nos mester asigna cada asunto na e comision of instancia corecto, determina ken ta responsabel, busca e experticio y asistencia financiero necesario, pone un fecha y sigui te ora tin resultado.”
E meta ta pa e Comision Special di Caribe funciona como un brug entre problema y solucion: conecta nos islanan cu otro parlamentonan, expertonan, organismonan internacional y posibilidadnan di financiamento.
“Como un hende muhe di Aruba, mi ta sinti e responsabilidad di representa nos isla cu orguyo. Aruba ta chikito, pero nos voz no tin nodi ta chikito. Nos mester uza e luga cu nos tin na mesa pa percura cu Caribe no solamente wordo scucha, sino cu nos prioridadnan wordo transforma den accion.”
E direccion pa december ta cla: identifica, asigna, financia, implementa y sigui. Pasobra exito di e Comision nobo aki lo no wordo midi den cantidad di reunion, sino den resultado cu pueblo di Aruba y Caribe por mira y sinti.
