Na ocasion di Housekeeping Week, parlamentario y presidente di Comision di Turismo di Parlamento, Jennifer Arends-Reyes, ta felicita tur trahado di housekeeping na Aruba y ta expresa su gratitud pa e dedicacion cu nan ta mustra den nan trabou diario.
“Hopi biaha nos ta drenta un camber di hotel of un espacio limpi y ordena, sin pensa den tur e trabou cu tin tras di esaki. Tin hende cu ta cuminsa nan dia tempran, ta traha duro y ta pone atencion na cada detaye pa otro hende por sinti nan comodo y bon bini. E siman aki ta un bon momento pa para keto y bisa nan: masha danki,” Arends-Reyes a expresa.
E trabou di housekeeping ta exigi esfuerzo fisico, pasenshi, precision y un sentido grandi di responsabilidad. Aunque hopi biaha e ta tuma luga tras di cortina, e resultado ta directamente visibel den limpieza, comodidad y calidad cu huespednan y publico ta experimenta.
Como presidente di Comision di Turismo di Parlamento, Arends-Reyes ta reconoce e contribucion valioso cu trahadornan di housekeeping ta haci na e experiencia cu bishitantenan ta hiba di Aruba. Un camber bon cuida, un ambiente limpi y e atencion personal di un trahado por haci un gran diferencia den estadia di un huesped.
“Nos ta papia hopi di calidad den turismo. E calidad ey ta cuminsa tambe cu e personanan cu ta cuida nos cambernan y espacionan tur dia. Nan esfuerzo ta forma parti di e hospitalidad cu ta haci Aruba special,” e parlamentario a indica.
Arends-Reyes ta destaca cu aprecio pa trahadornan di housekeeping no mester limita na un solo siman, sino mester wordo demostra durante henter aña. Esaki ta inclui e manera cu nan ta wordo trata, atencion pa nan bienestar, condicionnan digno di trabou y oportunidadnan pa nan sigui desaroya profesionalmente.
Segun Arends-Reyes, Housekeeping Week ta brinda un oportunidad pa haci visibel un grupo di profesional cu tin un papel esencial tanto den industria turistico como den otro organisacionnan y institucionnan cu depende di nan servicio.
“Pa tur trahado di housekeeping: mi kier felicita boso di curason. Mi sa cu boso trabou ta exigi hopi esfuerzo, pasenshi y dedicacion. Boso por ta orguyoso di e contribucion cu boso ta haci. Masha danki pa cuida cada detaye y pa duna tanto di boso mes den boso trabou. Masha pabien cu Housekeeping Week!” Jennifer Arends-Reyes a conclui.
