Gobierno di Aruba ta inicia un siguiente fase den revitalisacion di centro di Oranjestad cu firma oficial di contract cu BK Consult pa desaroya e diseño integral di Wilhelminastraat y su vecindario. E proyecto ta wordo realisa den cooperacion entre Ministerio di Finansa, Asunto Economico y Sector Primario, Ministerio di Infrastructura y Oficina di Prome Minister. Cu e firma aki y presentacion di e prome renderings, Gobierno ta move e proyecto di e fase di vision y seleccion pa e fase di diseño final y preparacion tecnico necesario pa posteriormente por pasa na ehecucion di e trabounan.
E proyecto ta parti di un vision mas amplio pa trece mas bida, actividad economico y inversion bek den curason di Oranjestad. Revitalisacion di centro no ta trata solamente di embeyecemento di cayanan. E ta trata di crea un ambiente urbano na unda hende kier y por biba, traha, inverti, cumpra, come, bishita y pasa tempo, y na unda empresarionan por identifica oportunidad pa sigui inverti y crece.
Wilhelminastraat tin un posicion importante den e vision aki. Historicamente e area a combina vivienda, comercio, gastronomia y actividad social. Meta di e proyecto ta pa fortalece e caracter propio di e area y, na mes momento, crea un espacio publico mas funcional, accesibel y atractivo pa residente, comerciante y bishitante, tanto durante dia como anochi.
E firma di contract cu BK Consult ta resultado di un proceso di destaho publico structura. Siete compania di arkitectura a registra pa participa na e destaho, di cual cuater a presenta nan concepto visual. E propuestanan a wordo evalua basa riba criterionan tecnico, funcional y estetico prepara pa DOW, y a wordo presenta dilanti di un comision di evaluacion forma, entre otro, pa Prome Minister Mike Eman, Minister di Finansa, Asunto Economico y Sector Primario Geoffrey Wever, Minister di Infrastructura Rene Herde, comerciantenan di Wilhelminastraat y otro stakeholdernan relaciona cu desaroyo di Oranjestad.
BK Consult a wordo selecciona pa sigui desaroya su propuesta y transforma e concepto den e diseño final, bestek y documentacion tecnico necesario pa ehecucion di e proyecto. E diseño ta enfoca, entre otro, riba calidad di espacio publico, mobilidad, funcionalidad, sostenibilidad y conservacion di identidad historico di Wilhelminastraat.
E siguiente fase di Wilhelminastraat no ta un proyecto aisla. E ta continua riba pasonan cu Gobierno a tuma durante e ultimo añanan den centro di Oranjestad. Desde e prome fase di Wilhelminastraat na 2022, apertura di Plaza Comercio na 2024 y apertura di Cas Veneranda na 2026, inversion den espacio publico a combina cu otro proyectonan cu tin como meta pa trece mas hende y actividad bek den ciudad. Un ehempel di e liña di vision cu ainda tambe ta andando, ta e transformacion di e anterior edificio di Ministerio Publico den vivienda pa studiante.
Na mes momento, revitalisacion ta conecta directamente cu maneho economico. For di 1 di januari 2026, Gobierno a introduci incentivonan fiscal pa stimula inversion y renobacion di propiedadnan den centro di Oranjestad y San Nicolas. E incentivonan, bou di condicionnan specifico, ta inclui entre otro exoneracion di winstbelasting y dividendbelasting pa un periodo di dies aña y otro beneficio fiscal relaciona cu renobacion y benta di propiedadnan.
E combinacion di inversion publico y condicionnan pa facilita inversion priva ta forma un parti importante di e strategia. Ora espacio publico y infrastructura mehora, y na mes momento tin condicionnan cu facilita inversion, Gobierno ta crea un base pa comerciante, doño di propiedad y inversionista por participa den desaroyo di centro di ciudad.
Minister di Finansa, Asunto Economico y Sector Primario, mr. Geoffrey Wever, a indica cu e meta ta pa transforma vision y maneho den resultado cu comunidad por mira y sinti.
“Pa hopi tempo nos a papia di e vision pa centro di Oranjestad, nos a traha plan, desaroya maneho y tuma diferente paso concreto. Pero un vision ta haya su balor ora nos pueblo por cuminsa mira y sinti su resultado. Cu firmamento di e contract pa diseño di Wilhelminastraat, nos ta trece un otro parti di e vision aki, un paso mas cerca di realidad.”
Segun Minister Wever, Gobierno su rol no ta limita na renoba un caya. E responsabilidad ta tambe pa crea e condicionnan necesario pa actividad economico por desaroya. Esaki ta inclui infrastructura y espacio publico, facilitacion di inversion, incentivonan fiscal y colaboracion cu empresarionan, comerciantenan, doñonan di propiedad y otro stakeholdernan.
“Un ciudad dinamico no ta wordo crea door di Gobierno so. Sector publico y sector priva mester traha hunto pa por logra esaki. Wilhelminastraat mester bira un area cu ta duna hende un motibo pa bin den centro di Oranjestad y keda den centro di Oranjestad, mientras cu ta crea oportunidad pa negoshinan existente y inversion nobo.”
E cooperacion entre e diferente ministerionan ta esencial den e siguiente fasenan di e proyecto. Ministerio di Infrastructura tin un rol importante den e parti tecnico y infrastructural, mientras cu Ministerio di Finansa, Asunto Economico y Sector Primario ta conecta e inversion den espacio publico cu e vision economico mas amplio pa stimula actividad, inversion y desaroyo den centro di Oranjestad. Oficina di Prome Minister ta forma parti di e coordinacion general den cuadro di e vision di Gobierno pa revitalisacion di capital.
Cu BK Consult awor encarga cu desaroyo di e diseño final, Gobierno ta continua cu e siguiente fase tecnico di e proyecto. E renderings presenta ta representa e direccion inicial pa e area, mientras cu e trabou di diseño y documentacion tecnico lo prepara e base pa futuro implementacion.
Revitalisacion di Wilhelminastraat ta asina forma parti di un proceso mas amplio pa gradualmente fortalece centro di Oranjestad como un area pa vivienda, comercio, gastronomia, inversion y actividad social, cu espacio publico cu ta sostene e funcion economico y urbano di nos capital.
