Fraccion di MEP ta expresa su preocupacion riba e manera cu Gobierno ta propone pa revisa e Landsverordening Normering Topinkomens (LNT). Pa MEP, prome cu un cambio di tal maginitud, mester haci un evaluacion serio: kico no ta funciona, pakico no ta funciona y kico ta e alternativa?
E propuesta kier kita companianan estatal y varios institucionnan publico for di e alcance di e LNT y reemplaza e salario maximo actual pa un sistema nobo di norma. Sin criteria cla, e sistema nobo por crea desigualdad y arbitrariedad, y mas serio ainda, sin evaluacion.
E excepcion pa AAA ta preocupante
E preocupacion ta bira ainda mas grandi door di e trato diferente cu ta worde duna. Pa un funcion na AAA, ocupa door di un funcionario di exterior, e minister a duna un excepcion aña pasa caba, mientras cu pa directornan local no a worde duna e mesun excepcion y ta worde sigui un proceso largo y mas complica.
MEP a puntra e minister riba cua criteria obhetivo ta worde duna un excepcion, y pakico e mesun criterio no ta wordo aplica igual pa tur. E discusion no ta solamente tocante salario. E ta tocante igualdad di trato, transparencia y consistencia di politica di Gobierno. Si e cambio proponi ta laga institucionnan importante for di e ley y e normanan pa esnan cu ta keda no ta suficientemente cla, MEP ta di opinion cu ta mihor pa trek in e LNT, pasobra loke ta resta di e ley no ta consistente, coherente ni responsabel mas.
Un ley no mester existi solamente. E mester tin un proposito cla, criteria igual pa tur y mester por logra su meta.
