Parlamentario Xiomara Maduro: Minister ta pidi parlamento su aprobacion politico pa por bypass ley

Durante reunion publico riba e Ley di Normering Topinkomens (LNT), Parlamentario Xiomara Maduro a cuestiona fuertemente e ruta cu Minister Wever di Finansa kier sigui pa saca diferente compania y entidad for di alcance di e LNT sin cambio di ley.

Minister ta pidi Parlamento su gevoelens, esta un direccion y aprobacion politico, pa e cambionan cu Gobierno kier haci riba e LNT. Pero segun Maduro, e problema fundamental ta cu Minister Wever kier uza un begunstigend beleid pa limita e alcance di LNT mientras e ley mes ainda no a wordo cambia.

Minister Wever ta pidi Parlamento su aprobacion politico pa haci algo cu ley no ta permiti. Parlamento no por duna Minister permiso pa ‘bypass” un ley vigente.

Si e LNT ta aplica na un compania of entidad, Gobierno no por simplemente pone e entidad ey pafo via un beleid. Si Gobierno kier cambia alcance di e LNT, e mester presenta un cambio di ley na Parlamento cu ta contene e cambio hunto cu su consehonan huridico y financiero relevante.

Durante e reunion a bira evidente cu Minister Wever no a bin suficientemente prepara. Ainda falta claridad por ehempel riba cua entidadnan exactamente ta wordo saca di e LNT, cua ta keda, pakico nan ta wordo trata diferente y con Gobierno kier ehecuta e cambionan legalmente. “E proceso ta robes. Minister Wever mester a haci su huiwerk prome y presenta un solucion cu ta cuadra cu ley. Despues e por pidi Parlamento pa duna su opinion politico.”

Parlamento su tarea ta controla Gobierno, no duna un “cheque blanco” pa Gobierno busca un manera pa bypass un ley cu Parlamento mes a aproba. “Como un hurista, Minister Wever mester sa bon cu e no por pidi Parlamento bay di acuerdo pa e por actua contra ley. E solo echo cu Wever ta propone algo asina, ta condenabel,” Parlamentario Maduro ta enfatisa.